Leitar etter bygg som kan huse nye asylmottak

Bakgrunnen er at dei allereie eksisterande mottaka er fulle, eller i ferd med å bli det. Difor har Norsk Folkehjelp bestemt seg for å ta initiativ til fleire mottak.

– Vi prøvar å finne bygningar og hus som ligg for seg sjølv og som vi kan tilby asylsøkarane, seier Grete Apelseth, leiar ved Jølster mottak som er drive av Norsk Folkehjelp.

Utfordrande situasjon

Straumen av flyktningar frå det krigsherja Syria til Europa og Norge har aldri vore større, og Utlendingsdirektoratet (UDI) sine anslag for kor mange vil kome til landet vårt blir stadig justert opp. UDI sitt siste anslag er no på 20.000-25.000 asylsøkjarar i 2015 og meir enn 30.000 i 2016.

• LES OGSÅ: Starta lokal innsamling for syriske flyktningar
• LES OGSÅ: Vil ha folk til å bruke meir tid på flyktningar

I tillegg er det planlagt å hente 5000 kvoteflyktningar, i hovudsak syriske borgarar, innan utgangen av 2016.

– Også Sogn og Fjordane må bidra, seier Apelseth.

Leitar etter alle typar bygg

Apelseth er bestemt på at organisasjonen har apparatet som treng for å kunne starte opp eit nytt mottak. Og situasjonen er no så kritisk at det hastar, meiner dei.

– Eigentleg så ønskjer ein primært å ha det i kommunar som ikkje har mottak frå før, slik at det ikkje skal bli så stor belastning, men slik situasjonen er no blir det altså kor som helst.

• LES OGSÅ: Ho krev at Gaular må ta imot fleire flyktningar

Så langt har dei fått litt tilbakemeldingar, men håpar at fleire vil gi respons dersom dei veit om bygningar som kan vere aktuelle.

– Det kan vere store bygg som hotell eller motell, eller mindre der ein kan ha desentraliserte einingar. Alle typar ledige bygg er i utgangspunktet interessante for å busetje flyktningar, seier Apelseth.

– Ikkje nok pengar

Jenny Følling, som er KS-leiar i fylket og påtroppande fylkesordførar, er glad for at Norsk Folkehjelp har teke initiativ til å opprette nye mottak.

Samstundes er ho veldig skuffa over regjeringa som i framlegget til statsbudsjett vil løyve 75 millionar ekstra til busetjing av flyktningar ute i kommunane.

• LES OGSÅ: Vil ha ordførardugnad for mottak av fleire flyktningar

– 75 millionar kroner er altfor lite. Den flyktningkrisa som Norge opplever no, den vil krevje mykje meir enn dette, så har Stortinget ein jobb å gjere. Dette er ikkje nok å handtere det busetjingsbehovet som kommunane vil ha, seier Følling.