Vil ikkje ta imot 15 nye flyktningar

– Vi meiner vi ikkje vil ha kapasitet til å handtere 15 nye flyktningar til neste år no når mottaket kjem, seier ordførar i Høyanger, Petter Sortland.

• LES OGSÅ: 150 asylsøkjarar til Høyanger i november - ordføraren er uroa

Skulle ta imot 50 på tre år

Det var i fjor at kommunen vedtok at dei skulle ta imot 50 nye busetnadsklare flyktningar dei komande tre åra. 20 personar i 2014, 15 til neste år og 15 i 2016.

Å busetje flyktningar er frivillig for kommunane, men dei vert oppmoda om å ta imot og legge til rette for nye flyktningar kvart år.

Men rådmann Arve Varden har skrive ei tilråding der han argumenterer for at det vert for krevjande for kommunen å ta imot så mange som dei i utgangspunktet hadde tenkt, fortel ytresogn.no .

Asylmottaket skyv på flyktningane

Kommunen skal i løpet av november bli vertskommune for eit nytt asylmottak for 150 asylantar.

Dette har skapt store diskusjonar blant folk i Høyanger og ordførar Sortland har vore tydeleg på at det er krevjande for ein kommune som er på Robek-lista.

– Vedtaket om å plassere 150 asylsøkjarar i Høyanger har gått for fort, men no må vi gjere det beste ut av situasjonen, og er klare til å brette opp ermene.

• LES OGSÅ: Fråflyttingsstadar blir asylkommunar

Samrøystes nei til fleire

Formannskapet var samla denne veka og der var ei av sakene busetning av flyktningar dei komande åra.

– Skal vi ta vertsoppgåva vår på alvor og klare å ha eit godt nok apparat rundt asylsøkjarane som kjem på mottaket, vil ikkje vi ha moglegheit til å ta imot flyktningar til neste år, seier Sortland.

Han seier dei har bede rådmannen om ei gjennomgang av situasjonen til sommaren igjen, for då å vurdere saka på nytt.

Skulle vere 20, vart 29

I løpet av året har kommunen til saman busett 29 flyktningar. Ni fleire enn det dei bestemte seg for å takke ja til.

– Det har blitt 29 på grunn av familiegjenforeining. Det synest vi er kjempekjekt og vi ser at borna trivst på skulen og er godt integrerte.

Sortland rosar flyktningkonsulenten i kommunen for innsatsen som er lagt ned i arbeidet med flyktningane.

– Ein svært dyktig konsulent og eit godt apparat rundt dei som har kome til oss er viktig og avgjerande for at dette skal gå bra.

• LES OGSÅ: – Marknaden må ikkje få avgjere kvar det skal vere asylmottak

Vesentleg med støtteapparat

Per no bur det 61 flyktningar i kommunen der 27 av dei er ungar.

– Vi skulle gjerne hatt fleire arbeidsplassar å tilby dei og gjeve dei meir arbeidstrening. Men slik er det i ein liten kommune.

Med eit asylmottak like om hjørnet jobbar kommunen no med å kartleggje behovet for fleire ressursar på oppvekst og helsesektoren i kommunen.

Auka press på tenester

Det er førebels uvisst kor mange fleire hender som trengst, men Sortland trur det vil bli eit vesentleg auka på press på desse sektorane.

– Vi har fått råd om å auke bemanninga når det gjeld helsesøstertenester. Og vi ser også på kva kompetanse vi treng i skuletilbodet vårt når asylsøkjarane kjem, fortel Sortland.

I midten av oktober vert det folkemøte om asylmottaket der Norsk mottaksdrift vil informere innbyggjarane i Høyanger om korleis situasjonen blir framover.

– Vi i kommunen fekk ei slik gjennomgang og det var svært nyttig for oss, seier ordføraren.