– Det er like kjekt kvar gong. Og det er artigare jo fleire det blir. Eg får jo ei stadig lengre medaljerekke, smiler Inger Anne Frøysedal.
Ho har akkurat sikra seg sitt sjette strake NM-gull i tresteg, og kan med rette kalle seg norsk tresteg-dronning.
Med eit lengstesprang på 13,45 meter var ho heilt suveren - med nesten ein meter ned til Oda Utsi Onstad på andreplass.
- LES OGSÅ:
Har vore skada - men satsar neste år
25-åringen frå Stryn tok sitt første NM-gull i 2009. Sidan den gongen har ho ikkje sett seg tilbake. Og ho ser framleis framover.
– Eg har vore lenge skada i ein hamstring, og det er om lag to månader sidan sist eg hoppa med piggsko, så eg vil ikkje planleggje for langt fram. No tar eg eitt år om gongen, seier ho.
– Men eg føler eg har meir inne. Eg har tenkt å satse også neste år.
- LES OGSÅ:
- LES OGSÅ:
Gir seg ikkje før ho har norgesrekord
I sommar har Frøysedal hatt ein mellombels lisens som veterinær på Andøya. No ventar eit års vikariat på Sortland. Det let seg fint kombinere med satsing.
I år gjekk EM-håpet i vasken grunna skade. No er ho igjen topp motivert.
– Kva mål har du sett deg framover?
– Eg vil gjerne slå norgesrekorden. Vil helst ikkje gje meg før den er min.
- LES OGSÅ:
Har hoppa lenger, men ikkje godkjent
Den norske rekorden tilhøyrer Lene Espegren frå Tjalve, og er på solide 13,85 meter - sett i Kroatia i 1999.
Det høyrer med til historia at Frøysedal i juli 2010 hadde eit forsøk på 13,88 meter, men at det var for mykje medvind til at ho fekk godkjent sprangt som norsk rekord.
– Du er jo berre 25 - og har kanskje fleire år med nye sjansar?
– Ja. Det er fint mogleg å hoppe nokre år til, seier stryningen.