Gjenoppbygginga vil koste millionar – men politikarane må spare

Dagen etter storflaumen har dagslyset avslørt dei enorme skadane naturkreftene har valda.

Mellom anna er fleire titals fylkesvegar øydelagde eller stengde av ras og flaum. Midt i katastrofen har fylkespolitikarane i hovudutvalet for samferdsle i dag sete i kuttmøte.

– Eg må sette min lit til at vi her får hjelp frå nasjonale myndigheiter, seier fylkesordførar Åshild Kjelsnes.

• LES OGSÅ: Sogn og Fjordane må kutte til beinet - må spare inn minst 200 millionar kroner
  
• LES OGSÅ: Sogn og Fjordane fylkeskommune får 235 mill. kr mindre å rutte med
  

Maktar ikkje oppbygginga åleine

For fylket går tronge tider i møte etter at det nye inntektssystemet vart lansert tidlegare i år. Sogn og Fjordane fylkeskommune må kutte minst 200 millionar kroner dei neste fem åra.

Åshild Kjelsnes seier det vil ta lang tid før dei får oversikt over kva det vil koste å byggje opp vegane som er vaska vekk. Men det er ingen tvil om at rekninga vil svi.

– Dette vil bli ei kjempeoppgåve, både praktisk og økonomisk, seier ho.

Med klimautfordringane som er spådd i framtida, meiner ho vi treng ein debatt om ansvaret storsamfunnet skal ha når slike naturkatastrofar inntreff.

– Det blir berre meir og meir klart at lokalsamfunna, og for den del fylkeskommunen, ikkje kan makte desse oppgåvene åleine, seier Kjelsnes.

(Artikkelen held fram under biletet)

Forventar å få hjelp

Kjelsnes seier fylkeskommunen no skal sette i gong å dokumentere skadane og kva dei vil koste. Samstundes forventar ho at storsamfunnet bidreg når oppryddinga etter kvart skal byrje

• LES OGSÅ: Fjellovergangar kan bli vinterstengde, og to ekspressbåtruer kan bli kutta
  
• LES OGSÅ: Skadeskoten fylkesøkonomi kan spare pengar på færre politikarar
  

– Det er klart at her må nasjonale myndigheiter på bana og eg kjem til å ha tett kontakt med dei.

– Har vi råd til gjenoppbygging, slik som situasjonen er no?

– Vi har ikkje noko val, seier Kjelsnes.