Lensmannskontoret i Bremanger er førebels det einaste i Sogn og Fjordane som er aktive på Facebook. Dei melde seg inn i det sosiale nettverket i byrjinga av februar i år, og har no nesten 800 følgjarar.
- LES OGSÅ:
Nyleg har dei også teke i bruk sida si for å varsle innbyggjarane i kommunen om kommande fartskontrollar, skriv Firda.
Førebygging
I eit av innlegga som informerer om fartskontrollar som har blitt heldt, legg lensmannskontoret til denne setninga på slutten:
«Vi vil informere om at det vil bli avholdt fleire kontroller i kommunen utover våren.»
Lensmann Hans Rune Strandos kallar varslingane for førebyggjande arbeid.
– Alt arbeid som politiet gjer skal ha eit førebyggande poeng over seg. Vi må prøve å førebygge straffbare handlingar, og vi må prøve å få hastigheita ned i distriktet vårt for å skape tryggare åtferd på vegen, seier Strandos til NRK.
Han meiner det er heilt naturleg at politiet varslar om kontrollar, og fryktar ikkje at dei som trykk for hardt på gassen berre vil senke farten når det er kontroll. Han ser heller ikkje vekk frå at dei vil komme med meir konkrete åtvaringar for når kontrollane vil bli heldt.
– Politiet har i alle år varsla om kontrollar, og vi kan jo nå mange gjennom Facebook og seie at vi er ute i dag på ein kontroll og vi ser fram til å møte dei på ein hyggjeleg måte. Klarar vi å synleggjere at vi har ein høg aktivitet ute trur eg at vi, når vi snakkar om fart, kan få ned fartsnivået, seier lensmannen.
– På lik linje som vi må vere opne på det gjennom andre medium, må vi prøve å synleggjere aktiviteten vår. Ein politimann i uniform som står ved vegen syner at der er vi, men vi må også gi beskjed om at vi kjem til å vere ute i framtida, seier han.
God respons
Sidan lensmannskontoret som det første i fylket melde seg inn i det sosiale nettverket Facebook har responsen vore svært god.
– Ja, den er veldig positiv. Folk ser at det skjer noko. Og så får vi også inn tilbakemeldingar frå folk som meiner vi bør vere andre stader. Vi har oppretta kontakt med innbyggjarane i kommunen på ein heilt annan måte. Terskelen for å ta kontakt har blitt mykje lågare. Vi har fått kjennskap på ting vi heilt sikkert ikkje hadde fått kjennskap til tidlegare, seier Strandos.
Trur fleire kjem etter
Trass i Facebook-suksessen innrømmer lensmannen at han sjølv var i tvil før dei sette i gang prosjektet.
– Eg var vel ein av dei som var mest tvilande her på kontoret til kor ope dette kom til å bli, men det er veldig mykje folk i alle aldrar som kommuniserer med oss om ulike ting, og ikkje berre trafikk. Så det synest eg er veldig greitt. Dei kan spørje om forvaltning, komme med tips om saker som vi bør sjekke nærare.
Strandos fortel at det også har komme positiv respons frå andre lensmannskontor, og han trur det berre er eit tidsspørsmål før andre kjem etter.