Usikkert om Hansen blir klar til viktig bortekamp

– Han er i gang med lett fotballtrening, og kan snart trena med resten av laget, seier fysisk trenar Eirik Nedrehagen.

Strekk

Den so langt mållause spissen og kantspelaren har fått mykje tillit av Harald Aabrekk denne sesongen. Dei siste månadene har rogalendingen stort sett vore ute med skade.

– Han er litt for ivrig, so me prøver å halda han litt att, men han kan snart trena fotball med resten av laget. Det er uvisst om han kan spela på søndag seier Nedrehagen.

Bortekampen på søndag er ein veldig viktig kamp for Sogndal. Om sognelaget tek poeng mot Odd Grenland bergar dei plassen tippeligaen.

• LES ÒG: Landets tettaste forsvar smuldrar opp

– Føler meg 100 prosent

Hansen byrjar å trena fotball att med resten av laget onsdag. 23-åringen meiner sjølv at han er klar til å spela bortekampen mot Odd Grenland søndag.

– Det kjennest veldig bra ut, og eg håpar å få spela kampen. Men eg må ta nokre forholdsreglar, og det er bra at nokon passar på slik at eg ikkje slår det opp att ein gong til, seier Hansen.

Rogalendingen fekk eit kortvarig comeback i kampen mot Strømsgodset. Etter 43 minutt kom skaden attende, og Hansen gjekk skuffa rett ned i garderoben.

• LES ÒG: Kortvarig comeback for Hansen

– Det har vore nokre seige veker. Men ein må berre bita det i seg og gjera det beste ut av det. Eg har trent godt, og eg gler med til å koma i gang att, seier 23-åringen.

Kanskje spelt sin siste

Barry Kader slit med overbelastning i magemuskulaturen, og det er uvisst når han er klar att. Dermed er det mogleg at Ivorianaren har spelt sin siste kamp i Sogndal-drakta.

(Artikkelen held fram under biletet)

• LES ÒG: Slutt for Kader i Sogndal

Eivind Daniel Røed slit med eit seneproblem på baksida av låret, og er truleg ute resten av sesongen.

Eidaren har berre fått éin kamp frå start og to innhopp denne sesongen.

• LES ÒG: Sogndal snusar på svenskar

Nyoperert nordlending

Joakim Rudolfsen har vore plaga med skadeproblem denne sesongen, og har berre spelt to tippeligakampar som innbytar denne sesongen.

– Joakim er nyoperert for Jumpers Knee, og er klar at tidlegast etter nyttår, seier Nedrehagen.

Rudolfsen kom til Sogndal frå 2. divisjonsklubben Mo før 2010-sesongen, men har enno til gode å overbevisa i Sogndal-drakta.