Desse gutane jobbar i barnehage etter skuletid – målet er å rekruttere fleire menn

– Då eg var liten tenkte eg at eg ville jobbe i barnehage, og no når eg fekk sjansen kunne eg ikkje kaste den vekk, seier Are Dale Erikstad som er i Vassenden barnehage i Jølster.

Han er ein av dei som no nyttar seg av tilbodet om å jobbe i barnehage etter skuletid.

Ei nysatsing der unge gutar kjem og leikar med borna skal lokke fleire menn inn i barnehagane.

Berre ein av ti tilsette i barnehagane i Sogn og Fjordane er menn.

(Artikkelen held fram under biletet)

Mjuke og tøffe menn

– Det blir moro å få innsikt i korleis dei jobbar i barnehagen og korleis det er å jobbe med born, seier Krister Smaadal.

Prosjektet er betalt av fylkesmannen. Høgskulelektor ved Høgskulen i Sogn og Fjordane, Sigrid Bøyum meiner det er ei viktig satsing.

– Eg synest det er veldig positivt at ein startar tidleg og inkluderer gutar i livet i barnehagen. Ein kan ha menn som arbeider med born, ein kan ha mjuke menn og tøffe menn, på same side som ein kan ha mjuke og tøffe kvinner, seier Bøyum.

• LES OGSÅ: Manglar ressursar til å ta seg av traumatiserte born etter storbrannen

Mykje meir enn barnepass

I Vassenden barnehagen håpar dei at gutane vil oppdage at det å jobbe i barnehage er balansekunst mellom alvor og leik.

– Desse gutane kan få komme inn i barnehagen og oppleve av vi driv med meir enn berre å passar på ungane, men at vi leikar i lag med dei og mykje anna, seier pedagogisk leiar, Norunn Osen.

Ungane i barnehagen seier det er kult at gutane kjem i barnehagen. Då får dei leika med nokon som dei ikkje vanlegvis leikar med.

Får lyst til å prøve

Gutane i sandkassen trur at prosjektet kan gi dei meir lyst til å jobbe i barnehagen i framtida

– Eg trur sjansen aukar betrakteleg når eg får vere med i barnehagen og sjå korleis det er og då og få betalt for å gjere noko som er moro, så er det berre tipp topp, seier Krister Smaadal.

• LES OGSÅ: Full dekning gir fleire val – no blir barnehagar meir spesialiserte