Under ettermiddagssendinga frå Marifjøra i Sogn torsdag, delte radiokokken Steinar Lindstrøm fleire oppskrifter med både søtt og salt.
Til oppskriftene har Lindstrøm henta inspirasjon i sesongens skattekammer med råvarer frå Luster i Sogn. Om du treng inspirasjon til noko godt til helga, så kan desse oppskriftene vere til hjelp.
Brennesle til middag
Ein fin middagsrett til ein varm sommardag er suppe av brennesle. No på våren og tidleg om sommaren er brennesla på sitt aller beste, med nye grøne friske blad. Fleire forbind ofte brennesle med stikke og kløe, men smaken vil gjerne overraske.
Suppe av brennesle:
100–150 gram brennesle
1 liter kjøtkraft
2 dl creme fraiche
50 gram smør
40 gram kveitemjøl
Smak til med muskat, salt og pepar
Kok blada i lettsalta vatn i eit par minutt. Slå av kokevatnet og blada i ein blender eller stavmiksar. Ha mjøl og smør i ei panne og fres til det blir kvitt. Spe med kjøtkrafta og ha i brenneslene. Kok suppa i rundt 20 minutt. Smak til med salt, pepar og muskat. Tilsett creme fraische rett før servering. Legg eit halvt egg i kvar suppeskål.
Sjokolade og rabarbra til dessert
Etter brenneslesuppa kan radiokokk Lindstrøm freiste med både søtt og litt surt. Dette er oppskrifta på kokken sin sjokoladefondat.
Sjokoladefondant:
220 gram mørk sjokolade
200 gram usalta smør
160 gram sukker
90 gram kveitemjøl
4 heile egg
4 eggeplommer
Pisk egg og eggeplommer lett i lag med sukker. Smelt sjokoladen forsiktig i vassbad og bland saman med smelta smør
Mjøl rørast forsiktig inn til slutt.
Ha røra i små former, som gjerne er smurte med litt smør og strødde med kakao. Steik fondantane på 210 grader i 4–5 minutt.
Rabarbra er ein av ingrediensane som er henta rett ut frå ein varm sommardag. Dette er oppskrifta til Lindstrøm på rabarbrakompott.
Rabarbrakompott:
300 gram rabarbra
3 dl vatn
1 dl solbærsirup (ikkje utblanda)
4 stk. stjerneanis
1 stk. kanelbark
1 stk. vaniljestong
50 gram sukker
Skrell og skjær rabarbraen i fine stykke og ha det i kokande krydderlake. Då skal det ikkje koke meir. Ta rabarbraen opp frå laken. Jamn laken med maisen og ta rabarbraen opp att i blandinga. Smak til med sukker.