Tre partitoppar til leiren i Vevring

Til NTB seier Venstre-leiar Trine Skei Grande at dette er ei av dei viktigaste miljøsakene ved sidan av klimakampen.

– Ein skal aldri, aldri, aldri gi seg i så viktige saker, seier ho.

Alle dei tre partia håpar å vinne veljarar på motstanden mot gruvedrift og fjorddeponi. SV-leiar Audun Lysbakken ser det som eit viktig verdival.

– Greier vi å sjå verdien av andre ting enn pengar, eller skal interessene til eit selskap i Oslo alltid gå føre omsynet til miljøet og folk i distrikta? undrast han.

Leiar Rasmus Hansson i Miljøpartiet dei grøne seier til NTB at dei vil sparke i gang ein valkamp der gruvesaka i Vevring blir eiav dei viktigaste sakene.

– Det er ikkje gruve der i dag, og det har vi ikkje tenkt at det skal bli, heller.

• Les også: Høg temperatur og harde ord i debatten om gruvedrift i Vevring
• Les også: Han sakna forkjemparane for gruvedrift
• Les også: Har rekna ut at Naustdal får ti mill kr årleg i eigedomsskatt av gruvedrifta

Folkefest og debatt

Laurdag blir det folkefest og debatt på sommarleiren som blir arrangert av Natur og Ungdom, Naturvernforbundet og Vevring og Førdefjorden Miljøgruppe.

I debatten skal partileiarane Trine Skei Grande (V), Audun Lysbakken (SV) og Rasmus Hansson (MdG) delta, i tillegg til stortingsrepresentant Bjørn Lødemel (H), fylkesleiar Hilmar Høl (Ap), andrekandidat på fylkestinglista Tore Storehaug (KrF), fylkesvaraordførar Jenny Følling (Sp) og førstekandidat Frank Willy Djuvik (Frp).