Politiet fekk melding om uhellet klokka 17.19 fredag ettermiddag. Politi og ambulanse vart sende til staden.
– Det er eit einsleg køyretøy som har køyrt av vegen. Det tyder på at dei to personane i bilen er lettare skadde, seier Olaug Holme som er operasjonsleiar ved Sogn og Fjordane politidistrikt til NRK.no klokka 17.45.
Klokka 18.33 melder politiet på Twitter at dei to i bilen er sende til legevakta på Eid for kontroll. Bilen skal ha kome vestfrå og har køyrt ut i ei høgrekurve.
Klokka 20.15 kan politiet opplyse at dei to personane i bilen kom frå utforkøyringa utan skader.
Riksveg 15 var i ein periode stengd på staden i samband med uhellet og berging av bilen.