Høgre går fram 7,3 prosentpoeng til 39,2 prosnt av røystene og to kommunestyrerepresentantar fleire enn førre periode. Dette er situasjonen når dei aller fleste røystene er talde opp. Dersom det ikkje endar seg mykje, vil Høgre få ti av 25 medlemmer i det nye kommunestyret.
Den største utfordraren, Senterpartiet og Per Atle Kjøllesdal går tilbake 2,4 til 26,1 prosent og blir ståande med dei sju mandata partiet har i dag.
Arbeidarpartiet (tilbake 4,8 til 12,9) og Framstegspartiet (tilbake 3,4 til 3,8) er dei to partia som må avgje kvart sitt mandat til Høgre.
– Over all forventning
Ordførar Sven Flo er sjølvsagt nøgd med resultatet for Høgre.
– Det er over all forventning.
No startar forhandlingane om verva, og Flo ser det som naturleg at dei først snakkar med dei partia dei har hatt samarbeid med i inneverande periode.
– Vi går først til Arbeidarpartiet og Venstre, men vi er opne også for andre konstellasjonar.
Låg valdeltaking
Det som har overraska Flo negativt ved valet er den låge valdeltakinga, under 60 prosent.
– Eg kunne ha tenkt meg at fleire nytta røysteretten. Kva som gjer at så få har gått til urnene må vi sjå nærare på. Det kan hende at det at vi har jobba så godt saman i politikken i Stryn siste fire åra, utan store kontroversar, har spelt inn.
I Stryn er det og eit stort innslag av arbeidsinnvandrarar, og Flo kunne godt ha tenkt seg å vite meir om kor mange av dei som har røysta.
- Les også:
Her finn du valresultata for Stryn.
