Jubla for gjennomslag i Borlaugstunnelen

Tunneldrivinga har gått frå begge sider, men i dag møttest dei to arbeidslaga midt i tunnelen.

– Det vart markert med skåling med brus i glasa på røysa, og med kake og kaffi etterpå. Dei fleste av arbeidarane på anlegget var med på feiringa, fortel prosjektleiar Oddvin Ylvisaker i Statens vegvesen.

– Meir attraktiv

I juni 2014 blir veganlegget opna, og då vil E16 bli langt meir attraktiv å køyre, seier Ylvisaker.

– Denne tunnelen gjer at folk slepp å køyre det som i dag er den mest kronglete delen av vegen over Filefjellet, mellom Borlaug og Maristova. På denne strekninga er det og fire rasutsette punkt som bilistane slepp å engste seg for frå neste sommar.

(Artikkelen held fram under biletet)

1,76 milliardar kroner

Ylvisaker fortel at det er høg standard på den nye tunnelen, den er ein meter breiare enn dei andre nye tunnelane på E16 i Lærdal. Også stigningsforholda blir betre.

I 2016 skal heile strekninga over Filefjellet vere ferdig. Der vegen ligg ute i dagen skal den hevast over dagens nivå for at det skal vere lettare å halde den open om vinteren.

På strekninga forbi Nystova mot Tyinkrysset kjem det ein ny tunnel på om lag seks kilometer.

Alt i alt kostar utbygginga av E16 over Filefjellet 1,76 milliardar kroner.