Går nettleiga opp med ti øre, vil det koste Elkem 70 millionar – og då er det kroken på døra

Trass i massiv kraftutbygging i Sogn og Fjordane, må brukarar i fylket betale meir for

straumen enn folk i resten av landet. Årsaka til det er høgare nettleige. No fryktar industrien nedlegging.

Hjå Elkem Bremanger går omnane for fullt. Men det gjer dei ikkje av seg sjølv.

– Her er det snakk om stor varme. Til det treng vi masse energi og høg temperatur for å få prosessen til å gå, seier Gabriel Ossenkamp, som er plass-sjef på Elkem Bremanger.

• LES OGSÅ: Straumen er billegare enn på ti år

Brukar like mykje straum som Ålesund by

Det trengst mykje kraft for å smelte silisium.

– På heile verket på Elkem Bremanger brukar vi 100 Megawatt, noko som svarar til ein by som Ålesund, seier Ossenkamp.

Billig straum frå lokale kraftverk er helt avgjerande for smelteverket.

– Elkem kjøper straum frå eit lokalt kraftverk, og det går rett inn i produksjon rett ved sidan av her, seier Ossenkamp.

Men den massive utbygginga av kraftnettet i Sogn og Fjordane, gjer at nettleiga kan auke med så mykje som ti øre. Det høyrest kanskje ikkje så mykje ut. Men det vil koste Elkem 70 millionar kroner i året.

– Viss nettleiga vert auka med ti øre, slik det er sagt, så er det slutten for Elkem Bremanger, seier Ossenkamp.

• LES OGSÅ: Fryktar dyrare nettleige på straum
• LES OGSÅ: Regjeringen legger frem ny støtteordning for industrien

Er ei urettferdig ordning

Det er politisk vedteke at ein skal satse på fornybar energi, og byggje ut i Sogn og Fjordane. Og då er det snakk om straum som ikkje ein gong skal brukast i fylket, men bli eksportert til resten av landet som ikkje har nok kraft.

– Føremålet med Ørskog-Fardal-linja er å løyse krisa i Midt-Norge og få energien dit, samt leggje til rette for småkraft, seier nettsjef i Sogn og Fjordane Energi, Asgeir Aase.

Likevel må industribedriftene i Sogn og Fjordane betale for utbygging av straum dei ikkje treng.

– Det er ei ordning som er svært urettferdig. Den er ikkje overlevbar, og det går ut over våre kundar og vår industri, som blør kvar einaste dag, seier Aase.

• LES OGSÅ: Rimelegare nettleige i Tussa
• LES OGSÅ: Nøgd med at kraftverdiane blir verande i vest

Treng rask avklaring

No vil energinæringa at kostnadane må bli meir jamt fordelte over heile Norge.

Olje- og energidepartementet seier at dei har sett ned ei ekspertgruppe for å sjå på problemet, og vil vente med å vurdere dagens praksis til ei har fått ein rapport frå gruppa i 2014.

Det er mager trøyst for Elkem Bremanger.

– Dette er viktig for oss å på avklaring på. Vi jobbar med lange horisontar, og uvisse betyr utsetjing av investeringar. Det hastar med å få dette på plass, vi må få vite kva som skjer, seier Ossekamp i Elkem Bremanger.

• LES OGSÅ: Trur gigant kan gi lågare nettleige