Vegen opna etter ras - oppryddingsarbeidet held fram måndag

– No har dei avslutta arbeidet og begge felta er no rydda. Det vil vere redusert fartsgrense på staden då det manglar rekkverk som blei teke med i raset, opplyser Roger Nedberge Hille hjå Vegtrafikksentralen i Lærdal klokka 19.20 søndag kveld.

Arbeidet med å rydde vegen vil halde fram frå klokka 7.30 måndag morgon. Det kan bli stengingar på inntil ein halv time. Er det lite trafikk kan det bli stengt i ein heil time.

Det var manuell dirigering på staden frå klokka 17.00. Då var berre eit felt ope for trafikk, opplyste Vegtrafikksentralen tidlegare i kveld..

Raset trefte vegen rett rundt klokka 17.50 laurdag ettermiddag, like etter avkøyringa til Hylland, og har kome ned i eit eksisterande rasløp. Raset dekkar over begge køyrefelta.

– Raset er 200 meter langt, mellom 50 og 60 meter breitt og fem meter høgt, seier Nedberge Hille.

• Besøk NRK Trafikk for oppdaterte trafikkmeldingar
  

Blir opna søndag ettermiddag

Meldingane søndag føremiddag gjekk ut på at vegen kom til å vera stengd til måndag.

Men oppryddingsarbeidet har gått raskare enn forventa, og no trur dei at dei kan opna vegen klokka 17 i dag, søndag.

– Geologen som var i området sa at så lenge det sluttar å renne vatn ned fjellsida, så skal det vera trygt å ferdast på vegen, seier Nedberge Hille.

– Nøyaktig når vegen opnar er ikkje sikkert, men rundt klokka 17, seier han.

Kraftig regn og torevêr

Det har vore kraftige regnbyger og torevêr i fylket laurdag ettermiddag og kveld, og det er truleg årsaka til raset.

– Politiet er der og sikrar staden, og det blir gjennomført søk i rasområdet. Men per no er det ingenting som tyder på at nokon er tekne av raset, sa Kjetil Drange, operasjonsleiar hjå politiet i Sogn og Fjordane til NRK laurdag kveld.

Det er omkøyring via riksveg 7 over Hardangervidda eller riksveg 13 over Vikafjellet.