I tv-serien Norske attraksjonar besøkte Linda Eide nokre av attraksjonane du ikkje finn i reisebøkene.
Iført sin raude joggedress ber ho oss lyfte blikket og sjå ting rundt oss på ein litt annan måte. Då kan du sjølv kome på sporet av ein Norsk attraksjon.
Her kan du sjå attraksjonane:
Piza eller Ofredal?
Halvvegs inne i fjellet oppdaga entreprenøren at dei hadde sikta feil. Dermed fekk Ofredalstunnelen, akkurat som tårnet i Pisa, ei utilsikta helling.Resultatet vart avisartiklar verda rundt, og at "alle" fekk vite om bygda.
Den overveldande Fridjof
På Vangsnes i Vik står det som kanskje verdas mest overdimensjonerte presang. Statuen av den lokale vikinghelten Fridjof den frøkne, er ei gåve frå tyske keisar Wilhelm. Linda Eide besøkte statuen i Sogn.
Våtaste staden i landet
Brekke i Gulen er den våtaste staden i landet. Her har dei norgesrekord i nedbør. I 1990 regna det 276 dagar i løpet av året, og det kom nesten seks meter med regn. I 1989 regna det så mykje at 17.mai-toget vart flytta innandørs for første song i historia.
Vegen som aldri kom fram
Ein av dei største attraksjonane i Fjaler er ein vegskandale. Skammens veg og verdas dyraste geitesti vert den kalla. Vegen skulle føre fram til ei bru over fjorden, som skulle erstatte ferja. Men pengane forsvann og vegen enda i ingenting.
Det mest selde postkortet
På Galdestølen i Lærdal finn ein motivet til Norges mest selde postkort. Det var i 1932 at budeia Anna Skaar ikkje fekk flytta på ei purke. For å prøve å flytte grisen klatra budeia opp på ryggen til purka. Ein fotograf såg tilfeldig det som hende og fekk tatt bilete.
