Mannen har vore sakna sidan natt til laurdag 8. november då han var involvert i eit biluhell ved Øvresetkrysset på fylkesveg 60.
I dag har helikopteret søkt langs begge sider av fylkesvegen over fjellet til Utvik.
- LES OGSÅ: Sjekkar ut nye tips i forsvinningssaka
– Det er ein naturleg måte å utvide søkeområdet på. Vi har også utvida søkeområdet rundt ulukkesstaden ved krysset, seier lensmann Nils Ove Roset.
Søkjer i dag
Roset seier at det ikkje er nye tips som har utløyst bruken av politihelikopteret. Helikopteret er det einaste i sitt slag i landet.
Lensmannen seier at det er det gode vêret og faren for snø som gjer at dei nytta seg av moglegheita til å bruke helikopteret.
– No brukar vi helikopteret i dag til det blir mørkt. Det gjer at vi får søkt over eit større område, seier han og presiserer at politiet framleis er interesserte i tips i saka.
Står framleis på bar bakke
Politiet har gjennomført fleire avhøyr og det er gjort fleire omfattande søk, men står framleis på bar bakke i forsvinningssaka. Søka har engasjert mange frivillige personar.
- LES OGSÅ: Mor til sakna: – Noko er heilt gale
– Det er godt at mange bryr seg. Det er ei god trøyst i denne vanskelege tida, skreiv mor Kirsti Sørland i ein SMS til NRK.no.
Politiet har heile vegen presisert at dei ikkje har grunnlag for å tru at det har skjedd noko kriminelt.