– Eg føler at vi har stabilisert oss i næringa. Vi er rimeleg trygge og gode, seier fylkesleiar Rolf Olav Tenden i Lastebileigarforbundet Sogn og Fjordane.
Etter nokre tøffe år med mykje minustal i bransjen, meiner Tenden at næringa no ser ut til å vere over kneika.
- LES OGSÅ:
Små overskot – sterk eigenkapital
NRK har kartlagt årsrekneskapen til 19 av dei største transportselskapa i Sogn og Fjordane (sjå tabell under). 13 av dei gjekk i fjor med overskot, fem gjekk med tap, mens tala for eitt av selskapa ikkje er klare.
Aktørar som Thor Tenden Transport AS i Stryn, Magnus Nistad AS i Gaular og Per A. Øren i Høyanger noterte alle små overskot.
– Vi ser at resultata varierer litt, og det er ikkje dei store overskota i prosent. Viss ein ser på landsgjennomsnittet så ligg næringa på mellom 1 og 4 prosent i overskot. I tillegg må ein sjå på eigenkapitalen og styrken til selskapa, seier Tenden.
Han viser til at mange har vore i bransjen i lenge og har god eigenkapital til å kunne bere konjunktursvingingar.
Eit døme er Per A Øren Transport sitt holdingselskap. Per Andreas Øren og broren Lasse har 16 millionar i eigenkapital. Magnus Nistad AS har over 7 millionar kroner.
- LES OGSÅ:
- LES OGSÅ:
Fylkets største slit framleis
Men for fylkets desidert største transportør, Firda Billag-eigde Transferd, vart det nok eit år med millionunderskot. Med ein omsetnad på 319,7 millionar kroner er den tidlegare lastebildivisjonen til billaget i Førde i ein eigen liga kva gjeld storleik i Sogn og Fjordane.
Men selskapet som er 100 prosent eigd av det interkommunale Firda Billag har framleis til gode å levere overskot
Administrerande direktør Peter Midthun finn likevel trøyst i at underskotet vart kraftig redusert.
– Det skulle berre mangle. Vi hadde eit forferdeleg år i 2012. Vi var nøydde til å forbetre oss, seier Midthun om underskotet som krympa frå 16 millionar kroner i 2012 til 5,9 millionar i 2013.
– Vi jobbar med å få ting opp å gå slik dei skal. Eg har grunn til å tru at vi skal få det til, seier Midthun.
- LES OGSÅ:
(Artikkelen held fram under biletet.)
Buss i pluss
Han kan derimot gle seg over at bussdrifta, Firda Billag Buss AS, leverer solide overskot.
– Busselskapet er vi fornøgde med. Der leverer vi bra tal, og har hatt ei god drift både i 2012 og 2013, seier Midthun.
Men om konsernet også vil tene pengar på lastebilane i år, kan han ikkje love ...
– Våren var ikkje heilt god for oss, men det har gått betre dei siste månadene. Vi skal i alle fall komme ein god del betre ut enn kva vi gjorde i 2013. Det har vi all grunn til å tru. Om vi når balanse, er eg litt usikker på, seier Midthun.
- LES OGSÅ:
Godt år for Slinde
Blant dei som kom best frå det i 2013 var Slinde Transport på Slinde i Sogndal. Selskapet med 20 lastebilar fekk eit overskot på 3,3 millionar kroner før skatt.
– Sånn generelt må vi vere fornøgde, seier dagleg leiar Magne Ahlin.
Han fortel at selskapet har gjort grep for å omstille seg og betre kunne møte den auka konkurransen frå utanlandske transportørar.
– Dette er noko vi som køyrer mykje langtransport mellom Aust- og Vestlandet merkar spesielt godt. Det er mørke skyer over oss. Men vi har lykkast i å finne nye samarbeidspartnarar, kundar som ser dette problemet, seier Ahlin.
- LES OGSÅ:
Mjølkebil god butikk
Best fjorårsresultat i høve til omsetnad fekk Råheim Transport på Viksdalen. Mjølkebilane frå Gaular omsette for drygt 20 millionar kroner, og leverte eit overskot på 3,6 millionar kroner før skatt.
Selskapet satsar, og gjorde nyleg avtale om å overta bilar og sjåførar frå mjølketransportør Rolf Nygård på Lavikdalen som går av med pensjon.
Dagleg leiar Inge Råheim ønskjer ikkje å kommentere det gode resultatet.
- LES OGSÅ:
Trur dei fleste vil overleve
Etter nokre konkursar og fusjonar i bransjen dei siste åra, mellom anna bortfallet av Kårstad Transport, trur leiaren i lastebileigarforbundet at dei som no er att, vil overleve.
– Eg trur at dei vil klare seg rimeleg godt vidare. Det er ikkje dei store overskota, men vi må også vere klar over at vi i denne næringa har høve til å skrive av materiell i løpet av fem år. Så avskrivingsprosenten er høg i høve til andre næringar, seier Rolf Olav Tenden.
NB. Per A Øren i Høyanger har skilt ut transport og entreprenør som eigne selskap f.o.m. rekneskapsåret 2013. Entreprenørdelen av selskapet stod i fjor for ein omsetnad på 54 millionar kroner.