Slik enda turen for tjuvane - og i framsetet låg brekkjarnet

– Dette er ein BMW X3 som vi fekk tips om i natt etter innbrot både på Vassenden og i Førde. Bilen er no funnen i Hafstadbakken, seier politibetjent ved Førde og Naustdal lensmannskontor, Bjarne Brudevoll.

Bilen var køyrd til endes på ein skogsveg like ovanfor innkøyringa til Førde austfrå. Her var bilen forlaten i skogkanten, med venstre framhjul dinglande i lause lufta over ei djup grøft.

Politiet kjenner seg sikre på at det er denne bilen som vart nytta under innbrota både ved Coop-butikken på Vassenden i Jølster og Biltema i Førde, som skjedde mellom klokka 00.55 og 02.00 natt til fredag.

• LES OGSÅ: Dobbelt butikkinnbrot i natt

(Artikkelen held fram under videoen)

Hadde lagt att brekkjarnet

Tjuvane skal ikkje ha fått med seg noko av verdi frå innbrota. Men ved Biltema er både ei glasrute og fleire dører øydelagde, då tjuvane har brukt brekkjarn for å komme seg inn.

Brekkjarnet låg lett synleg på passasjerplass i bilen då bilen vart funnen.

– Det er rimeleg å tru at dette er brekkjarnet som dei nytta for å bryte seg inn, seier Brudevoll.

Politiet har førebels ikkje konkrete tankar om kven som har køyrt bilen og forlate han på skogsvegen.

– Vi har ingen sikre tankar om det. Men vi har mobile vinningskriminelle i bakhovudet. Men det veit vi ikkje sikkert, seier Brudevoll.

• LES OGSÅ: Tjuvane prøvde seg på safen, men fekk ikkje napp

(Artikkelen held fram under biletet)

Hadde stole både bil og skilt

Politiet veit med sikkerheit at bilen er stolen.

– Både bil og skilt er stolne. Bilen vart stolen i Bergen i slutten av oktober. Skilta er stolne frå ein annan bil, seier Brudevoll.

Bilen vert flytta med bergingsbil ned til ein eigna stad, der politiet vil gjennomføre undersøkingar.

– Vi vil ta ein grundig sjekk av bilen, seier Brudevoll.

Det var ein turgåar i området som oppdaga bilen og tipsa politiet om at dette kunne vere den etterlyste bilen.

– Han hadde høyrt i media at vi var på jakt etter bilen, seier Brudevoll.