Slik blir nye Utsikten

– Det blir veldig bra. Eg er veldig fornøgd med det entreprenøren gjer. Det er krevjande betongarbeid, men dei gjer ein kjempejobb, seier prosjektleiar Bjørn Andresen i Statens vegvesen.

På Gaularfjellet, drygt 700 meter over havet tek eit 800 kvadratmeter stort betongflak form. I kvar ende, tre venger. Den eine stikk fleire meter ut frå fjellsida. Ei har trapper og sitjeplassar i betong. Den tredje, den som arbeidarane held på å forskale, skal huse nye toalett.

• Les også: Slik blir utsiktspunktet

Arkitektur skal dra turistar

Den nasjonale turistvegen får sin eigen attraksjon, slik til dømes Trollstigen og Stegastein i Aurland har.

– Spennande arkitektur er eit verkemiddel for å få fleire turistar til å komme til Noreg. Det viser seg at arkitektur saman med spennande norsk natur når langt ut i verda, seier Andresen.

– Ein snakkar om særeigen arkitektur. Kva trur du folk vil seie om det?

– Det er alltid ulike meiningar om slike byggverk. Det har vi også registrert i ein tidlegare fase her. Men eg har eit bestemt inntrykk av at dette blir opplevd som spennande. Spesielt når ein kjem så langt ut i rommet på utkikksplattforma, med det mektige landskapet her, trur eg at det vil bli godt mottatt.

Heilt sidan vegen opna i 1938 har den vesle hylla på Balestrand-sida av fjellet berre blitt kalla Utsikten. I oktober skal plassen, som var ein parkering med eit enkelt toalettbygg og ein natursteinsmur som rekkverk, stå klar i ny drakt.

• Les også: Ligg litt etter skjema

(Artikkelen held fram under biletet.)

Ville heller hatt betre veg

Men ikkje alle som bur langs vegen er like begeistra.

– Det har hadde ikkje vore mi førsteprioritering å bygt noko slikt no. Dette blir fint og flott for turistante å sjå på, men vi som bur her i bygdene saknar betre vegdekke. Vi køyrer på dette heile året, seier Endre Råheim.

Han er drosjesjåfør og leiar i Noregs Taxiforbund Sogn og Fjordane, og har fylkesveg 13 som arbeidsplass.

– Eg synest det burde vore mykje meir fokus på vegen. Den er ei stor tragedie. Vi merkar den på slitasjen på bilane. Slitedeler må bytast lenge før dei skal på grunn av dårleg vegstandard.

(Artikkelen held fram under biletet.)

Er kjend med kritikken

Liknande kritikk har komme frå fleire hald, fortel prosjektleiar Andresen.

– Ja, det har vore kommentarar på dette tidlegare. Ein ønskjer jo sjølvsagt at det skal gjerast noko med vegen, men det er nok ikkje utsikter til så veldig mykje. Det inngår ikkje i satsinga på turistvegane.

Sjølve vegen er det nemleg fylkeskommunen som har ansvaret for. Dei nasjonale turistveg-midlane går først og fremst til opprusting av rasteplassar, skilting og informasjon.

(Artikkelen held fram under biletet.)

Opnar i juli

Men Utsikten skal bli bra, lovar Andresen

– Den er mektig. Det er jo eit veldig landskapsrom dette her, med toppar som går opp i 1400–1500 meter i dalrommet her. Og med skiftande lys- og vêrforhold er det eit veldig mektig panorama frå denne plassen.

– Rekk de å bli ferdige til årets turistsesong verkeleg set inn?

Vi blir ikkje heilt ferdige med alt. Mellom anna vil toalettbygget bli bygt etter ferien, men området skal i alle fall vere tilgjengeleg i juli månad.