Finn las epost medan han venta på vegopning

Vegen har meir eller mindre vore stengd sidan 10-tida tysdag grunna store trafikale problem på glatta.

Fleire køyretøy har stått bom fast på vegen mellom Sogndal og Fjærland. Problema forplanta seg til Sogndal der nordgåande trafikk vart stogga. Parkeringsplassen mellom Kvåle stadion og Fosshaugane Campus var tettpakka av trailerar og bilar.

• SJÅ: Oppdaterte vegmeldingar hos NRK Trafikk

– Politiet stengde vegen lenger oppe og det vart full stogg nedover. Eg skjønar at det står mykje bilar nedover, seier vaktoperatør Jan Erikstad hos Vegtrafikksentralen i Lærdal.

Tolmodige bilistar

Entreprenørar har jobba på spreng for å halde vegbana køyrbar, men stadig snøfall har gjort arbeidet problematisk. Samstundes har bilbergarar hatt nok å henge fingrane i med å hjelpe fleire større køyretøy opp bakkane mot Frudalstunnelen.

Medan austgåande trafikk har fått gå nokre timar, har fleire bilistar måtte smørje seg med tolmod i Sogndal.

– Vi fekk beskjed om å parkere her. No har vi stått her i straks tre timar. Det er kjedeleg, men slikt ein må finne seg i når ein køyrer på vinterstid her i landet, seier yrkessjåfør Geir Hansen.

– Litt frustrerande

Hansen vedgår han ikkje hadde venta full stogg på veg gjennom Sogndalsdalen mot Florø i dag.

– Det er litt frustrerande. Timane går jo, og ein har berre eit visst tal timar for dagen ein kan køyre, seier han.

Finn Engedal var tidleg ute for å nå eit møte på andre sida av dalen, men måtte i staden lese 50 epostar og kontakte leverandørar og kundar i inn- og utland.

– Eg har gjort ein god jobb med det systemet som finnast i dag. Ein kan få gjort det meste, så det er ikkje noko problem å bli ståande ein time eller to, seier han.

Har vore tolmodige

Vaktoperatør Erikstad hos Vegtrafikksentralen i Lærdal har inntrykk av at bilistane har vore tolmodige.

– Vi fekk tidlegare i dag mykje spørsmål frå bilistar som stod i kø, men det verka som om dei har innfunne seg med situasjonen og har sete på vent. No håpar vi å få strødd så godt at dei som står der skal få komme seg opp på skikkeleg vis utan meir stogg, seier Erikstad.