I september i fjor skreiv Sogn og Fjordane politidistrikt ut av ei av dei største bøtene til eit oppdrettsselskap nokon gong.
Marine Harvest måtte betale to millionar i bot og tole inndraging av 10 millionar kroner frå omsetninga av smolt og setjefisk frå anlegget på Haukå i Flora.
Men Marine Harvest godtok ikkje bota frå politiet og gjekk til sak. No har Fjordane tingrett avgjort at politiet ikkje hadde grunnlag for å ilegge selskapet noko bot og inndraging.
For stor produksjon
Tingretten har i staden dømd politiet til å betale Marine Harvest sine sakskostnader på nær 250.000 kroner.
- Les også:
Saka dukka opp hos politiet etter at Fylkesmannen i Sogn og Fjordane melde verksemda for overproduksjon av setjefisk, og dermed for mykje utslepp av avfall til fjorden.
– Bakgrunnen er ei politimelding vi fekk frå fylkesmannen om at det hadde vore for stor produksjon frå 2008 til 2012, sa politiadvokat Jørn Lasse Førde Refsnes til NRK i september.
Ikkje rettskraftig
Men tingretten meiner at bevisa for at Marine Harvest har gjort det fylkesmannen hevdar medvite er for dårlege. Dei kritiserer også fylkesmannen for å ha brukt svært lang tid på sakshandsaming av utsleppsløyva til anlegget på Haukaa i Flora.
Kommunikasjonssjef i Marine Harvest, Ola Helge Hjetland, peikar på at domen ikkje er rettskraftig før ankefristen på 14 dagar har gått ut.
– Men Marine Harvest er glad for at retten støttar vårt syn i saka og har frifunne oss på alle punkt, seier Hjetland.
