Då Sogndal fredag kveld møtte Raufoss til treningskamp i Sognahallen var det utan forsvarsspelaren Victor Grodås.
På siste treninga til Sogndal på Gran Canaria for ei veke sidan, rauk han det bakre korsbandet. Kneskaden sett han ut av spel halve sesongen.
– Det er veldig kjedeleg å ikkje vere med å trene og førebu meg på Tippeligaen som eg har drøymt om heile livet. Men eg skal gjere alt eg kan for å vere klar så fort som mogleg, for eg vil jo vere med og bidra i år også, seier Grodås, som debuterer i eliteserien.
Heile sesongen stod i fare for å ryke
Men han hadde hell i uhell. Med ein operasjon kunne han vore ute heile sesongen.
– Når du tek det bakre korsbandet er det ikkje like alvorleg som det framme. Men i enkelte tilfelle må likevel du operere. Det måtte ikkje eg, fortel han.
– Var du nervøs for å miste heile sesongen?
– Med ein gong tenkjer du det verste og du bur deg på det, så får alt anna vere ei positiv overrasking. Men no ser det veldig bra ut.
I staden for å sitje på sidelinja og følgje lagkameratane er Grodås i Oslo med legar og spesialistar. Fredag fekk han beskjeden han hadde venta på, det blei ikkje operasjon. Men det er framleis ikkje heilt spikra. Onsdag skal han på sin siste kontroll.
– Det er ikkje heilt stadfesta, men veldig sannsynleg, seier han og legg trykk på «veldig».
– No har eg fått på ei skinne som eg skal bruke i seks til åtte veker og late det gro, og så skal eg trappe opp treninga gradvis etter det. Eg får nok god oppfølging hos fysioterapeut i Sogndal, seier Grodås.
– Kjedeleg å miste han
Og god oppfølging, det kan trenar Eirik Bakke love han.
– Han er i dei beste hender, seier han.
Men likevel synest Bakke det er trasig å miste han i sesongstarten.
– Det er spesielt kjedeleg for han som hadde gledd seg til å spele i Tippeligaen, men skadar veit vi aldri når kjem. Det er kjedeleg for alle, men det er ein del for fotballen.
Også han er letta over at ikkje heile sesongen ryk.
– Di kortare tid han er ute di betre er det, seier Bakke.
Sjølv har trenaren fullt fokus på dei to treningskampane denne helga.
– Det viktigaste no er å kome i god fysisk form så vi er godt førebudde på det som møter oss i mars.
Fredagens kamp mellom Sogndal og Raufoss i Sognahallen enda 1–1. Gilbert Koomson scora for Sogndal.