Sinte bønder seinka trafikken

Om lag klokka 15 i dag gjekk bondeorganisasjonane til nye aksjonar i Førde og Sogndal. På begge stader køyrer fleire traktorar sakte gjennom sentrumsgatene og senkar trafikken. Bak ratta på traktorarane sit bondelagsmedlemmer som gjer dette for å protestere mot Staten sitt tilbod i jordbruksforhandlingane.

- Eg tykkjer det er greitt at vi får markert oss på denne måten. Eg veit det er mange som ikkje set pris på det, men det må vi tole i kampens hete, seier leiaren i Sogn og Fjordane Bondelag, Per Hilleren.

• LES OGSÅ: Bønder stengde fjellovergang - vart truga med pryl
  
• LES OGSÅ: Bøndene stengde Utvikfjellet

Brot i forhandlingane

Bøndene kravde tidlegare i år 2,2 milliardar i auka løyvingar gjennom jordbruksforhandlingane. Målet til bondeorganisasjonane var at 2012 skulle vere året då bøndene tok innpå lønsutviklinga til andre grupper i samfunnet. Då Staten sitt tilbod kom var det på 900 millionar kroner. Bøndene braut raskt forhandlingane og varsla aksjonar. I dag har ei rekke aksjonar vorte gjennomførte landet over.

Tidsklemme

- Eg begynnar å kome i tidsklemme no. Eg skal hente i barnehagen, fortalde ein av bilistane i sakte fart gjennom Førde sentrum.

- Eg har vel ein viss sympati for bøndene, men det spørst om barnehagen delar den sympatien.

Sogn og Fjordane politikammer mottok ein telefon frå ein irritert bilist på grunn av aksjonen. Elles var det stilt.

- Om det ikkje blir verre enn dette ser vi ingen grunn til å gripe inn. Det går seint gjennom Førde og Sogndal, men det har ikkje stoppa opp, seier Politiet.

Sure fjes i trafikken

- Stort sett har det gått bra. Nokre sure fjes ser me, men ingen har fløytt på oss enno og ingen har vist fingeren, seier leiar i Sogndal Bondelag, Per Magne Fimreite frå traktoren sin i Gravensteinsgata.

I Sogndal har trafikken gått seinare enn normalt, men det har likevel ikkje korka seg heilt.

- Om det hadde skjedd hadde vel politiet vore her kjapt, seier Fimreite.

Fingrar i Førde

Litt meir hektisk vart det i Førde. NRK-reporter Erlend Blaalid Oldeide kunne like før klokka 16 fortelje om lange køar alle vegar.

- Her har det korka seg til. Eg har sett eit par fingrar, men bøndene får mykje støtte. Eg trur me kan rekne ti tommelfingrar per langfinger. Det er hundrevis av bilar i alle retningar, rapporterte Oldeide frå ein av rundkøyringane i Førde.

Bøndene i Sogndal og Førde parkerte traktorane og avslutta aksjonane i Førde og Sogndal litt over klokka 16.30.