Isac Elliot (14) blir kalla Finland sitt svar på Justin Bieber. I går heldt han konsert under Norway Cup, medan fansen hylte som besett framfor scena.
To av hans største beundrarar, Maren Johansen Myklebust (15) og Hannah Christine Baust Erdal (15) frå Dale, fekk kome nærmare på idolet enn dei nokon gong hadde drøymt om. Saman med ti andre heldige fekk dei nemleg danse saman med han på ein av songane.
– Det var heilt utruleg og ei oppleving for livet, seier Maren Johansen Myklebust.
- Les også:
(Artikkelen held fram under biletet)
Fekk eit eksklusivt møte før konserten
Dagen starta med øvingar og lydprøver med fire av dei faste dansarane til Elliot. Så, like før dei skulle på scena, fekk dei eit eksklusivt møte med tenåringsstjerna sjølv.
– Eg var ganske roleg, men hjartet banka litt ekstra fort når eg såg han, fortel Johansen Myklebust.
Seansen varte i snaue ti minutt, men for dei ti heldige utvalde vart det eit minne for livet.
– Vi tulla litt med kvarandre, tok bilete og fekk autografar. Det var skikkeleg gøy, mykje betre enn eg trudde det skulle bli, seier Johansen Myklebust.
Avslutta konserten med ein klem
Ikkje mindre minnerikt skulle det bli då dei endeleg fekk kome på scena og vise kva dei har øvd på, framfor eit hav av elleville publikummarar.
– Det var proppfullt over alt, du såg berre ein masse menneske. Det var så gøy. Det å danse for Isac framfor så mange, det går ikkje an å beskrive det, seier Johansen Myklebust.
Dansen var over på to minutt, men vart avslutta av eit nytt høgdepunkt for Johansen Myklebust.
– Når vi var ferdige å danse så fekk eg ein kjempegod klem av Isac på scena. Det var så koseleg, fortel ho.