Den om lag 40 kilometer lange Aurlandsdalen er eitt av dei mest spektakulære turområda i landet. Men dei siste åra har besøket gått nedover, og no skal ei ny hengjebru lokka turgåarane tilbake.
For 150 år sidan måtte ein over denne elva på veg oppover dalen. No finst det andre alternativ, og brua over elva vart for nokre år sidan øydelagd i eit stort steinras.
– Brua er ikkje heilt trygg å gå på no, så eg vil nok ikkje anbefala det, seier Bjørn Vike. Han er ein av dei som no vil setja den opphavlege traseen i stand, og hengebrua dei byggjer er første steg mot målet.
– For meg var det ein del av barneoppsedinga, ein måtte berre gå Aurlandsdalen. I dag må Aurlandsdalen konkurrere med mange andre flotte turmål, sjølv om det kanskje er den vakraste dalen i Norge. Det å etablera nye stiar og nye moglegheiter gjer at ein kan vera her i mange dagar. Det er mange spanande turar å gå og mykje å oppdaga, seier Vike.
– Den brua her blir på ein måte inngangsporten til eit nytt og spanande område som vert trekt fram att no.