– Det som er mest urovekkjande er at kommunane ikkje klarer å møte den tida som kjem. Då vert pasientane liggande der dei er, og vi får dei ikkje ut av sjukehuset. Konsekvensen er fleire korridorpasientar og eit dysfunksjonelt spesialisthelsetilbod, seier fagdirektør i Helse Førde Hans Johan Breidablikk.
Fleire eldre vert fleire pasientar
Talet på eldre aukar. Samstundes melder kommunane tilbake at dei treng fleire tilsette for å klare å ta seg av pasientane.
– For kvar pasient dei har i dag, får dei to i framtida. Då kjem dei verkelege utfordringane for kommunane. Dei må finne nye måtar å behandle og samhandle på, seier han.
For sjukehusa sender pasientar ut så snart dei kan, og dermed er det heimkommunen sitt ansvar å behandle pasienten vidare. Med aukande tal eldre, vil talet på pasientar auke.
Helse Førde klarer å få ned liggedøgna slik samhandlingsreforma krev.
– Dette er eit av hovudformåla ved samhandlingsreforma. Det kan ikkje vere ei overrasking.
- Les også:
Treng pengar og kompetanse
Ei undersøking utført av Høgskulen i Sogn og Fjordane og Vestlandsforsking på oppdrag av fylkeskommunen viser at heile 43 prosent av dei som jobbar ute i kommunane meiner pasientar vert skrivne ut for tidleg.
– Eg trur det viktigaste vert kompetanse og friske mildar til å møte auken i talet på pasientar kommunane skal ta seg av, seier KS-leiar Jenny Følling.
Følling peikar på at pasientar frå sjukehusa fører til press på andre pasientgrupper i kommunane. Og tala viser at det er ein auke i talet på reinnleggingar i Helse Førde.
- Les også:
Fleire kjem tilbake til sjukehusa
– I 2011 var det litt over 16 prosent av pasientane som vart innlagt innan 30 dagar etter at dei var utskrivne. I 2014 var det nær 21 prosent, seier samhandlingssjef i Helse Førde Vidar Roseth
– Kva er årsaka?
– Ein del kommunar bør ruste opp sine tenester for å kunne gje eit tilbod på ein betre måte. Men vi kan ikkje sjå bort frå at for sjuke pasientar vert skrivne ut for tidleg frå sjukehus, seier Roseth.
- Les også:
Vil slå saman kommunar
Breidablikk meiner kommunane ikkje kjem unna samanslåingar og samarbeid på tvers av kommunegrenser om dei skal klare å handtere samhandlingsreforma.
– Dei vurderingane klarer kommunane å ta sjølv, slår Følling fast.