– Eg kan stadfeste at det er Ivar Hermod Buskaker som omkom i ulykka i går kveld. Dei pårørande er informerte, og offentleggjering av namnet er i samråd med dei, seier lensmann i Luster kommune, Asle Karoliussen.
Ivar Buskaker har vore folkevald i Luster i mange år, i denne perioden som kommunestyrerepresentant og formannskapsmedlem for Arbeidarpartiet. Buskaker var på veg heim til Hafslo frå eit kommunalt møte i Gaupne då ulykka skjedde.
Luster-ordførar Ivar Kvalen er sterkt prega av å ha mista ein politikarkollega, og fortel at hendinga pregar alle dei tilsette på rådhuset i Luster.
– Dette er ein veldig trist dag. Vi har måtte teke ein pause i arbeidet i dag. Våre tankar går til Ivar sin familie, seier Kvalen, som er tydeleg merkt av ulykka.
Innstiller all møteverksemd
Han var mellom dei som var på møte med Buskaker i går kveld, like før ulykka.
– Ivar var ein sentral politikar, sat i formannskapet og var gruppeleiar for Arbeidarpartiet. Vi hadde stor møteverksemd denne veka, og vi var seinast på møte i lag i går kveld, seier Kvalen.
All møteverksemd i Luster kommune vert innstilt denne veka.
– Kommunen sitt kriseteam er i beredskap, og er klare dersom nokon har behov, seier Kvalen.
Ulykka skjedde då ein bil som kom frå Gaupne mot Hafslo, stoppa på fylkesveg 55 då han skulle køyre av mot Kjos.
– Det kom ein bil i mot som han ville vente på, seier Karoliussen.
- LES OGSÅ:
Gjekk rundt på taket
Bilen som kom bak den ventande bilen på fylkesveg 55, klarte ikkje å stoppe.
– Han sneia så vidt borti bilen som stod i ro, før han gjekk rundt på taket og hadde også ein samanstøyt med bilen om kom i mot, seier Karoliussen.
Den omkomne mannen var førar av bilen som gjekk rundt.
Den 19 år gamle mannen som var førar av bilen som kom i mot, vart køyrd til Førde sentralsjukehus med lettare skadar.
AMK opplyser at mannen vart utskriven i dag, etter å ha tilbragt natta til observasjon på vanleg avdeling.