– Vi kan ikkje aksepterer å vere utan biltransport til omverda i lang tid

Ein mellombels passasjertransport er i gang med å handtere passasjerane som onsdag ettermiddag skulle følgt ferja på sambandet Krakhella – Rutledal.

Grunna brann på heisehuset får ikkje ferja leggje til kai.

– Vi snakkar timar, framfor døgn og veker for å seie det slik, seier ordførar Ole Gunnar Krakhellen (H) om kor lenge øysamfunnet kan klare seg utan sambandet.

Håpar på løysing

Det er førebels uvisst kor lenge ferjesambandet vil vere ute av drift.

Prosjektleiar for ferjekai vedlikehald i Statens vegvesen, Audun Borlaug, seier dei at sambandet i beste fall kan vere i drift att frå i kveld.

– Dersom det berre er heisehuset, som vi til no har opplysningar om, så er dette ein kurant sak å få i gang igjen. Men vi veit førebels lite om andre skader på kaien, seier han.

Får følgjer for verft

Svein-Tore Eide hos Solund Verft er ein av mange næringsdrivande som kan bli råka av brannen.

Ettersom omfanget førebels er ukjent, vil han ikkje spekulere i kor store dei blir.

– Men vi har til dømes folk frå tre underleverandørar på veg i kveld. Medan persontrafikken går, så blir det vere med leveransar av deler. Slik sett er det klart at dette vil bremse dei jobbane vi har, seier Eide.

Har alternativ

Statens vegvesen har eit beredskapsaggregat på veg frå Leikanger til Krakhella. Dei håpar det vil vere nok til å få sambandet i drift att.

Ordførar Krakhellen seier han vil høyre med fylkeskommunen og Statens vegvesen om kva moglege løysingar ein kan få på plass.

– Dersom tek lang tid så må sjå på andre ferjesamband vi har, som Daløy – Haldorsneset lenger vest i kommunen. Det kan kanskje vere mogleg med ei kriserute dit, men det vil sikkert bli nær dobbelt så langt, seier han.