– Vi ønskjer å satse på norske meierispesialitetar, og då også gamalost. Vi vil ta med gamalosten til Grüne Woche i Berlin, den store forbrukarmessa i januar, seier eksportdirektør i Tine, Unni Sjøflot.
Grüne Woche er ei av verdas største forbrukarmesser for landbruk, mat og reiseliv med nær 400.000 besøkande og 1.600 utstillarar frå 60 land.
– Der ønskjer vi å få respons frå tyske forbrukarar på smak og kvalitet, seier Sjøflot.
- LES OGSÅ:
- LES OGSÅ:
Gjer ein ny offensiv
Gamalosten har også tidlegare vore med på Grüne Woche, men no satsar Tine meir enn dei har gjort tidlegare.
Det kan dermed vere første steg på vegen til å gjere gamalosten frå Vik til ein eksportartikkel.
– Vi syner fram gamalosten som ein spesialitet til kundane våre, så dei aller fleste Jarlsberg-distributørar rundt om i verda, kjenner gamalosten godt, seier Sjøflot.
Men no vil dei også la forbrukaren ta del i dette.
– Vi har ikkje gjort noko spesielt mot forbrukarar, men i januar vil vi gjere ein ny offensiv i Tyskland, seier Sjøflot.
(Artikkelen held fram under biletet)
- LES OGSÅ:
- LES OGSÅ:
Får innpass på KaDeWe
Men det er ikkje berre på messeområdet gamalosten skal testast på dei besøkande. På KaDeWe (Kaufhaus des Westens), Europas nest største varehus, vert gamalosten lagt ut til smaking.
– Vi vil gjerne syne den fram for dei som handlar på KaDeWe, det store handelssenteret midt i Berlin sentrum, seier Sjøflot.
Alt etter kva mottaking gamalosten får, kan osten frå Vik snart vere med i ei etablert rute ut i Europa.
– Absolutt. Då må vi ta steget vidare, det er heilt klart, seier Sjøflot.
I Norge sel gamalosten godt, og produksjonen ligg på om lag 90 tonn årleg.
- LES OGSÅ:
- LES OGSÅ:
Må sjå på det internasjonale potensialet
Det har vore gjort mykje forsking på gamalosten.
Mellom anna har pakistanaren Tahir Mahmood Qureshi avlagt doktorgrad om gamalosten og den helsefremjande verknaden som osten har for kroppen.
Forskaren kom fram til at osten mellom anna inneheld såkalla peptider som er blodtrykkssenkande, og effekten av desse aukar på veg gjennom fordøyingssystemet vårt.
I tillegg inneheld osten store mengder vitamin K2, som er bra for beinbygning og hjarte, og som er påvist å vere krefthemmande. Osten er også proppfull av protein.
– Det er viktig for oss å ha dei norske meierispesialitetane også til forbrukarar internasjonalt. Vi må sjå kva potensial vi har på dei internasjonale marknadane, seier Sjøflot.
(Artikkelen held fram under biletet)
- LES OGSÅ:
- LES OGSÅ:
Vert frosen ned etter ti dagar
Meieristyrar Per Henning Liljedahl ved Vik meieri seier alt ligg til rette for at gamalosten kan eksporterast.
Osten vert frosen ned etter ti dagar, når han er saltmoden. Det er for å stoppe modningsprosessen.
– Den prosessen tek til att når osten vert tint. Då modnar han seg til den grad du sjølv likar. Nokon vil ha han moden, medan andre vil ha han litt ferskare, seier Liljedahl.
Han kjenner ikkje til konkrete eksportplanar, men peikar på at gamalosten er med ut i Europa på ymse messer.
- LES OGSÅ:
Fekk ærespris og gull
Seinast i haust fekk gamalosten æresutmerking og gull ved meieriutstillinga International food contest i Herning i Danmark.
– Gamalosten har også tidlegare vore med på Grüne Woche, og det kjem att folk der som spør etter osten, så osten er absolutt populær i utlandet, sjølv om han førebels ikkje vert eksportert, seier Liljedahl.
I 2013 vart det selt litt over 90 tonn gamalost, og Liljedahl trur ei vil nærme seg det også i år.
– Vi har framleis gode salstal. Vi klarar nok ikkje å matche fjoråret, då vi hadde eit veldig oppsving. Men vi er ikkje langt etter, seier Liljedahl.