– Eg var lei av mangel på stikkontaktar og leidningsrot på golvet, seier gründer Frode Steen.
Løysinga hans «Smart Connect» er ein forgreinar med seks straumuttak som ein monterer rett i stikkontakten.
– Det kan ein gjera på eigehand, og det er gjort på tre minutt, seier Steen.
I tillegg til seks nye 220 V-uttak, gjev forgreinaren to USB-ladekontaktar.
– Då kan ein lada alt frå mobilkamera til kamera og andre tekniske duppedittar.
Steen seier det finst mange forgreinar på marknaden i dag men dei blir liggande i ein krok å samle støv.
– Med dette produktet får ein forureinaren opp på veggen og det vert ryddigare bak for eksempel fjernsynet, meiner Førde-gründeren.
Trur den vil selje godt
Steen trur produktet kan bli ein bestseljar.
– Med tanke på tilbakemeldingane vi har fått frå privatpersonar trur eg vi har ei ganske lovande framtid føre oss.
Den første forhandlaren dei har signert med er Coop Vest.
– Vi jobbar med å få til eit distribusjonsnett no, og håpar å få produktet ut i elbransjen og byggebransjen. I løpet av første halvår er vi vonleg klar til sal, seier Steen.
Han seier produktet vil kosta rundt 400–500 kroner, men at det ikkje er heilt klart enno.
– Genialt
Oppfinninga kan redusera brannfaren i huset, då brytaren på kontakten bryt begge straumkretsane, i staden for berre ein krets.
Fagdirektør Brann Odd A. Rød i Gjensidige Forsikring seier i ei pressemelding at produktet er eit av dei beste han har fått innsendt til vurdering
– Ideen og produktet er enkelt og genialt i forhold til montering og bruk, seier Rød og lovar at produktet vil bli tatt inn der for sal.