– Eg tykkjer eg har jobba godt lenge, og det var fleire som kunne ta tittelen. Eg er glad det vart meg, smiler Helene Johansen Vikøren.
– Det meste kan skje
Vikøren tok seg vidare til finaleomgangane med 413,2 poeng i Alfahallen på Gardermoen. Deretter måtte ein og ein av dei åtte finalistane sjå seg slått av årdølen. Det vart til slutt 205,3 poeng på 20 skot.
No håpar ho på like jamn og god skyting når EM startar i nederlandske Arnhem på onsdag.
– Målet er å gjennomføre arbeidsoppgåvene best mogleg. Ut frå det kan det meste skje, seier 17-åringen.
God utvikling
Vikøren har vist ei svært god utvikling sidan ho starta med luftrifle for halvanna år sidan. Ho har drive med DFS-skyting i åtte år.
I august i fjor vart ho nordisk meister i København, medan European Youth League-finalen i Serbia gav henne sølv.
– Kan du vere med å kjempe om EM-medalje?
– Det går an, men det er dei beste frå heile Europa som er plukka ut. Og alle vil nok det same.
– Alltid noko å strekkje seg etter
Luftrifle er ein presisjonssport på høgt nivå. Det er også difor ho tykkjer det er kjekkast.
– Det er internasjonalt, og du har alltid noko å strekkje deg etter. I DFS-skyting er det maks 350 poeng og heile tal. I luftrifle er 10,9 det beste, og det er umogleg å oppnå. Då er det om å gjere å tøye det så nærme som mogleg, seier ho.
Med 413,2 poeng på 40 skot i helga, gir det eit snitt på 10,33. Persen hennar er på 10,42 og skriv seg frå januar.
– Det er marginar, smiler ho.