– Då skal vi ha eit møte der vi kjem til å informere om Fylkesmannen si rolle, kva lovverk vi må halde oss til, og korleis det norske barnevernssystemet fungerer, seier Fylkesmann i Sogn og Fjordane, Anne Karin Hamre.
Den rumenske delegasjonen har allereie hatt møter med representantar frå Utanriksdepartementet, Barne-, likestillings- og inkluderingsdepartementet, samt Stortinget.
Vil møte kommunen og Fylkesmannen
Saka der barnevernet i fjor haust tok ut fem born frå ein norsk-rumensk familie i Sogn og Fjordane, har fått stor merksemd både i Romania og blant konservative kristne i fleire land.
Politiet har sikta foreldra for oppdragarvald, medan foreldra sine støttespelarar meiner norsk barnevern hindrar ei kristen oppdraging. Dette har ført til massive demonstrasjonar over heile verda, mellom anna i Bucuresti, London og Washington D.C.
- Les òg:
På grunn av dette er den rumenske delegasjonen på rundtur i Norge. I førre veke var dei i Oslo og hadde møte med fleire frå styresmaktene.
– Dei ønskte dei også eit møte med Fylkesmannen og den aktuelle kommunen, seier Hamre.
- Les òg:
Trur det kan bli fleire liknande saker
NRK har tidlegare fortalt om eit stort press både på kommunen, styresmaktene nasjonalt og Fylkesmannen i Sogn og Fjordane. Hamre har aldri tidlegare opplevd så stor merksemd kring ei barnevernssak.
– Så stor merksemd internasjonalt har vi ikkje opplevd før. Men fleire ekteskap på tvers av landegrensene, og fleire med utanlandsk bakgrunn som er busett i Norge, betyr nok at dette kanskje ikkje er siste saka. Det er noko som vi må leggje meir vekt på i opplæring og rettleiing av barnevernet framover, seier ho.
Hamre trur det er stor variasjon i kor vidt det i andre land er forståing for kva rolle barnevernet i Norge har.
– Det har vel til dels vore mykje feilaktig informasjon i det som er spreidd på sosiale medium. Men denne saka er forståeleg nok vanskeleg for rumenske styresmakter også. Så det blir viktig for styresmaktene i Norge å få ut så mykje sakleg informasjon som mogleg om norsk barnevern og det lovverket vi har her i landet.
Det blir også målet på møtet med den rumenske delegasjonen onsdag. Då skal også rumensk presse vere til stades.
– Vi håpar å få gjeve ein så balansert informasjon som mogleg, seier Hamre.