Her er det mest avslappande i heile verda, meiner amerikansk nettstad

Nettstaden har lista opp 15 stader i verda dei rår folk til å oppsøke om dei vil lade batteria og kople ut kvardagslivet sitt. Og på topp på denne lista står Nordfjord, Norway. Huff Post har lagt inn eit bilete frå Olden, truleg teke frå Rake.

Dette er fantastisk Nordfjord-reklame, seier dagleg leiar Marita Lindvik i Reisemål Stryn & Nordfjord.

– Det har stor betydning for Nordfjord-regionen at vi er kåra til den mest avslappande plassen. Her konkurrerer vi med internasjonale, attraktive plassar, og det å sjå at vi er på førsteplass er ei stor glede.

Ventar auka turisme

Ho trur at dette vil lokke mange til å oppsøkje Nordfjord neste sommar.

– Turistane er opptekne av totaliteten, ikkje berre overnatting og ein tur, og avslapping er in. Det at vi får ei gratis «pressemelding» på denne nettstaden vil føre til auka turisme hjå oss.

Lindvik fortel at hotell og campingplassar i Nordfjord rapporterer om stor auke i talet på turistar også i sommar.

– Vi får snart statistikkar som vi reknar med vil stadfeste inntrykket, og eg gler meg til å sjå tala.

• LES OGSÅ: Små nisjehotell opplever gode tider
• LES OGSÅ: Reisemål Stryn & Nordfjord i akutt pengenaud - ber eigarkommunane om ekstratilskot

Her er heile lista:

1. Nordfjord, Norge
2. Whitehaven Beach, Australia
3. Sanur, Bali, Indonesia
4. Navagio Beach, Hellas
5. Rocky Mountain National Park, Colorado
6. Rio Celeste Falls, Costa Rica
7. Pienza, Italy
8. Waipio Valley, Hawaii
9. Lake Louise, Canada
10. Grand Anse Beach, Seychellene
11. Seljalandsfoss, Island
12. Snowdonia National Park, Storbritannia
13. Flathead Lake, Montana
14. Bora Bora, Fransk Polynesia
15. Mount Hood, Oregon