Djuvik fortel at fylkespolitikarane var kjende med at Havila slit med økonomiske utfordringar, og at dette medverka til at fylkeskommunen ikkje ville selje til Sævik.
– Det har vore med i vurderingane fordi vi har tenkt langsiktig. Både i høve korleis ein best tek vare på fylkeskommunen sine verdiar og på lokale arbeidsplassar, seier Frank Willy Djuvik, gruppeleiar for Frp i fylkestinget.
- Les også:
I ei fersk børsmelding ber Havila om minst 200 millionar kroner i ny eigenkapital og at avdrag på banklån blir utsette, for å prøve å berge selskapet Havila Shipping. Ein svak marknad innan offshore og shipping har hatt negativ innverknad på selskapet. Havila Shipping av eit av fleire selskap i Havila-konsernet.
Påverka fylkespolitikarane
Med knappast mogleg fleirtal, 16 mot 15 røyster, vedtok fylkestinget å selje eigarposten i Fjord1 til transportselskapet Torghatten. Fleire har derimot teke til orde for at ein heller burde selje til sunnmøringen Per Sævik, eigaren av Havila-selskapa. Sævik er allereie medeigar i Fjord1 og ville vere den beste eigaren, meinte kritikarane.
– Resultatet kunne fort vorte at Havila ville selje seg ut for å sikre seg meir kapital i ein økonomisk krevjande situasjon. Kanskje ville aksjemajoriteten bli eigd av banken, seier Djuvik.
– De var redde for ein konkurs?
– Det kunne ha vorte eit resultat, seier Djuvik.
Hardt ut mot Djuvik
Havila-eigar, Per Sævik, har på ingen måte sans for Djuvik sine vurderingar.
– Dette er det reine vås. Vi har ein reiarlag-del, vi har ei verftsgruppering og vi er inne i Fjord1 allereie. Målet vårt er å bygge dette opp vidare. Å hevde noko anna og å spekulere i konkurs er lågmål, seier Sævik.
Han forsikrar at Havila-konsernet har solid økonomi trass i store utfordringar i supply -og shippingbransjen.
- Les også:
Fylkesordførar Jenny Følling ønskjer ikkje å kommentere Havila sine økonomiske utfordringar. Samtidig føler ho seg trygg på at det var rett å selje til Torghatten.