Stor interesse for byutviklingsplanene i Førde

Då kommunen inviterte til folkemøtet om den kommuneplanen tysdag, var interessa så stor at både bystyresalen og kantina i det nye rådhuset vart fylt med nyfikne tilhøyrarar.

Møtet blir også sendt direkte på nettet.

– Det kom langt fleire enn vi hadde venta. Difor måtte vi ta i bruk begge salane, vedgjekk ordførar Olve Grotle (H) då han opna møtet.

Stort planarbeid

Kommunen planlegg ei enorm strukturendring av kommunesenteret, noko som vil få følgjer for innbyggjarar så vel som næringsdrivande.

Målsetnaden er folkevekst på 1,5 prosent årleg fram mot 2027. I same perioden er målet ein sysselsettingsvekst minimum tilsvarande landsnivået.

– Eg tykkjer vi har jobba svært godt og fått mykje ut av pengane politikarane har gjeve oss. Planen er totalt på 1.200 - 1.300 sider, fortalde plan- og byggjesjef Odd Harry Strømsli.

Bustader i sentrum

Analysane gir eit målsett innbyggjartal på 15.400 innbyggjarar i 2027. I dag bur det kring 12.800 innbyggjarar i kommunen. Det gir behov for 1.200 nye bustadar. I den samband ser kommunen behov for å byggje tettar og høgare.

– Halva av dei nye bustadane skal byggjast i sentrum, sa Strømsli.

I tillegg til bustadpolitikk og sentrumsutvikling inneheld arealplanen ein planlagd regional handelspark på Brulandsvellene.

– Mange lurer på om det er handelshus vi skal ha på Brulandsvellene. Nei, det er ikkje det. Dei skal vi ha i sentrum, fortalde Strømsli.

Vern om dyrka mark

Mange spørsmål knytt til sentrumssatsinga på bustadutviklinga. Fleire var urolege for mengda av dyrka mark som må vike for satsinga på bustader i sentrum. Bustadfelt i Førdslia, Kirketeig, Grimeland og område over Slåttebakkane har vore vurdert.

Desse må vente.

– Eg trur det er viktig å ta i bruk Førdslia for å sikre dei som vil byggje nær sentrum, og ikkje minst for å lette trykket for dyrka mark. Vi blir fleire og folk vil trenge mat også i framtida, sa Kjell Olav Kusslid og fekk applaus frå forsamlinga.

Utbygging i Førdslia utløyser behov for veg forbi Sunnfjord Folkehøgskule. Her har dei hatt planar om utviding, mellom anna sju bueiningar som no er lagt på is.

– Den vegen vil øydeleggje for skulen si utvikling framover. Området blir delt i to. Vi ynskjer Førdslia, men vegen vil leggje band på utviklinga vår, sa inspektør Arne Håberg.

– Strategien er vekst i sentrum. Ved å opne opp for bygging i andre område, så vil dette punktere denne satsinga, svara rådmann Ole John Østenstad.

Ute på høyring

Kommunen vil også sjå på infrastruktur, ved å leggje til rette for kollektivtrafikk, gåande og syklande.

Planområdet er på til saman 348 dekar. Området for ny handelspark med leiligheiter utgjer 152 dekar.

Kommuneplanen er ute på høyring og lagt ut til offentleg ettersyn fram til 26. januar.