Keldian Journey of souls - Foto: Pressefoto /
Foto: Pressefoto

Internasjonal kontrakt

Aurlendingane har internasjonal platekontrakt, men musikken kjem ikkje ut her i landet.

- Det skuldast at plateselskapet ikkje trur denne musikken sel godt nok i Norge. Det seier Arild Aardalen i bandet Keldian frå Aurland.

Ikkje i norske butikkar

Keldian som består av Arild Aardalen og Christer Andresen, fekk internasjonal platekontrakt med Paris Records i fjor. Då kom debutplata deira Heaven's gate ut. Men ønskjer du å kjøpe plata, må du gå på internett. For i platebutikkane kjem den berre i utlandet.

- Det er jo litt ironisk, medgir Aardalen som i desse dagar gir ut si andre plate internasjonalt. Den nye plata har fått tittelen Journey of souls.

Keldian - Arild Aardalen og Christer Andresen frå Aurland er Keldian. - Foto: Pressefoto /

Arild Aardalen og Christer Andresen frå Aurland er Keldian.

Foto: Pressefoto

Rikt variert

Keldian er eit melodiøst metallband med ein god del inspirasjon frå 80-tals heavy metal og nyare power metal. Men dei er også innom både pop, klassisk og folkemusikk i stilen sin.
- Vi tenkjer ikkje så mykje genrer. Vi vil lage god musikk slik vi liker den. Då blir det slik det blir, sa Aardalen då han gjesta musikkredaksjonen Lutt på NRK Sogn og Fjordane.

Klar for Japan

Den første plata til Keldian har solgt 5000 eksemplar, og den har dei også kontrakt på skal komme ut i Japan.
- Dette er salstal vi er veldig nøgde med for å vere eit ukjent band som ikkje turnerer, seier Aardalen.
Høyr heile Lutt der Keldian var gjester.
Høyr berre delen med Keldian frå Lutt.

Studioband

Bandet er eit såkalla studioband. - Vi jobbar berre i studio, og turnerer ikkje. Ofte startar banda med turnering, så går dei i studio. Vi har gjort det omvendt. Det er lettare å få ting til i studio enn på scena, men før eller seinare så blir det nok turne, seier Aurlendingen.

God hjelp

På den nye plata har Keldian fått god hjelp frå musikarane Per Hillestad og Jørn Holen. Hillestad er kjend frå Lava og A-ha, medan Jørn er kjend frå Vreid. Bandet er også i gang med å jobbe på si tredje plate.