– Eg har følgd ho opp gjennom åra, og eg har brunne for å få fortelje om ho til andre, seier Silje Undal.
Ho er student på Noroff i Bergen, og saman med to bergensarar har ho laga ein portrettdokumentar om den unge kunstnaren Frøydis Aarseth (27) frå Naustdal.
Aarseth er frå Vevring og er no etablert som klassisk figurativ kunstnar i Bergen, der ho har eige atelier og kunstskule i Sandviken. Allereie som 19-åring reiste ho til Italia for å gå på The Florence Academy of Art i Firenze, før ho seinare var elev hos den verdskjende kunstnaren Odd Nerdrum.
I filmen fortel den unge kunstnaren også om draumen om å kunne leve av kunsten.
– Frøydis er ein veldig spennande person. Ho er ein dyktig kunstnar, og vi synest det var spennande å la ho fortelje meir om seg sjølv, slik at folk ikkje berre kjenner ho gjennom kunsten, seier Undal.
Aarseth går i dokumentaren også i djupna på nokre av måleria sine, der ho fortel om kor ho har henta inspirasjonen frå. Ho fortel også om kor ho hentar motivasjonen frå til å satse på ei karriere som kunstnar.
– Ho har jobba veldig hardt med kunsten, og det er fascinerande å sjå korleis ho har nådd måla sine, seier filmskapar Undal.
Ho har stått for regi og produksjon, medan Aleksander Sørhaug har hatt ansvar for foto, og Anton Hanson for klipp.