Den såkalla Earth Hour hadde liten effekt i Sogn og Fjordane. Medan folk vart oppmoda om å skru av alt lys mellom klokka 20.30 og 21.30 laurdag kveld, var det få som tok utfordringa.
For det var svært så lite nedgang i straumforbruket den aktuelle timen.
- Det var ikkje så veldig mykje. Det var omtrent ein halv prosent nedgang i høve veka før, fortel Berit Larsen i Sognekraft.
- Berre symbolhandling
Kommunalminister Liv Signe Navarsete oppfordra alle norske kommunar til å delta i Earth Hour-aksjonen. At responsen var dårleg i heimfylket, forklarer ordførar Jarle Aarvoll i Sogndal slik:
- Eg trur gjerne at denne typen kampanje har noko føre seg den første gongen. Og kva gjer eigentleg ein time ein gong i året frå eller til - det er berre ei symbolhandling, seier han.
Gløymde heile Earth Hour
NRK har snakka med fleire personar om kva dei gjorde mellom klokka 20.30 og 21.30 laurdag kveld.
Dei fleste har gløymt at det i det heile teke var Earth Hour.
- Eg sat sikkert og las avisa. Med lyset på, humrar ei kvinne på gata.
- Eg stod på badet med rettetang, og førebudde meg på å gå ut, ler ei anna.