Måndag presenterte regjeringa sitt vedtak for framtidas E39-trasé på Sunnmøre. Valet, ferjefri kryssing av Storfjorden med bru frå Hareidlandet til Sula mot Ålesund, får også prosjektleiar Eivind Hjellum i Kystvegen AS til å applaudere.
– Det er ei god avgjerd med tanke på ein framtidig kystveg mellom Bergen og Ålesund. Det gjer det mogleg samle trafikken frå E39 og frå kystvegen, og gjer det mogleg å få krysse den store fjorden sør for Ålesund, seier han.
Har si eiga bru
Kystvegen har som mål å få gul midtstripe langs heile strekka frå Ålesund til Bergen. Dei har også lansert sine eigne planer for fjordkryssing i Ytre Nordfjord.
På Sunnmøre valde regjeringa den lengste og dyraste løysinga, gjennom industriområda i regionen. Kva trasé regjeringa går for i Nordfjord, er førebels uvisst.
- LES OGSÅ: Slik tolkar forkjemparane avgjerda
– Dei ytre kommunane på Sunnmøre, har eit fantastisk industri- og teknologimiljø. Å kople dette saman med Ålesund, vil bety veldig mykje. E39 om Festøy ville blitt ein omveg, seier Hjellum.
Kyst i begge endar
Kystvegen AS har ikkje ville kaste seg inn i debatten om kvar i Nordfjord E39 skal krysse Nordfjord.
Han ynskjer heller ikkje å spekulere i kva avgjerda til regjeringa får å seie for kryssing av Nordfjorden.
– No har vi fått til ei løysing med kystnær E39 i begge endar – frå Bergen og over Nordhordlandsbrua i eine enden og inn mot Ålesund i den andre. Det som er sikkert er at det ikkje blir kystveg imellom, seier Hjellum.
