Kva er eit namn? Kvifor har me namn, kva brukar me dei til og kva betyr dei for oss? Det skal TV-serien Nomino og programskapar Gøril Grov Sørdal svare på, og første episode kjem på NRK1 og nett-tv klokka 19.45 i kveld.
– Vi møter utruleg mykje folk og får historiene deira om namn, seier Grov Sørdal, som meiner alle vil kjenne seg att i tematikken i programmet.
– Alle har eit namn. Det er ein menneskerett. Om du likar namnet ditt eller ikkje, er det ein del av deg. Om nokon herjar med namnet ditt, kjenner du det i magen.
Nettopp identitet og namnebyte – kva namnet betyr for folk – er tema i første episode i kveld. Deretter følgjer meir eller mindre lette tema utover i serien.
Om namn, mytar og Ronny
Av tema i andre episodar trekk Grov Sørdal fram foreldre som gir namn etter sin eigen lidenskap og kallenamn – og då går turen sjølvsagt innom Høyanger. I episode sju spør dei kvifor Ronny er ein skurk.
– Kvifor er Ronny ein skurk?
– Ja, men er han det då? Vi har både gått ut på gata og spurt folk, og gjennomførte ei undersøking over heile landet. Ein av seks trur Ronny har eit rulleblad!
– Det er ein del mytar knyta til namn?
– Mange trur «Rullegardin» har levd og at Bjørnar har vore forbode. Andre trur Vidkun og Adolf ikkje er lov. Men det er jo ikkje sant, seier Grov Sørdal
Donerte vekk namnevalet
Programskaparen er frå Vik i Sogn. Og innslaget av folk frå Sogn og Fjordane er stort i serien, i episodane 2,3,5, 7 og 8.
– Det er naturleg for meg. Det er bakgarden min. Eg kjenner folk er, og i tillegg er eg patriot, det skal eg ikkje leggje skjul på.
Nettopp folk frå Sogn og Fjordane, nærmare bestemt eit sambuarpar frå Florø, er sentrale i eit av dei meir «ekstreme» eksperimenta i serien.
– Me etterlyste eit gravid par som ville overlate heile namnevalet til oss. Me ville lage eit heilt nytt fornamn, og trengde nokon som ville «donere» ungen sin, ler Grov Sørdal.
– Foreldra skulle vere juryen. Eg vil ikkje seie kva resultatet blei, men få med dykk episode åtte. Dei var tøffe og eg trur dei vart nøgde og!