For no skal styringssystemet i den lengste vegtunnelen i verda byggast om. Mellom anna skal det bli kameraovervaking.
Dette fører til at det blir innført kolonnekøyring i delar av den 25 kilometer lange tunnelen, og at fartsgrensa blir sett ned til 70 kilometer i timen i den delen det er arbeid. Etter jul blir det nedsett fartsgrense i heile tunnelen, skriv Statens vegvesen i ei pressemelding.
Byggjeleiar Jens-Ivar Nilsen seier at dei prøver å skape minst mogeleg irritasjon og forseinkingar for trafikantane.
– Men vi veit at nedsett fartsgrense er med på å få ned risikoen og konsekvensane av ei ulukke i tunnelen.
Mobil- og naudnett verkar
Arbeidet skal gjerast i etappar på seks kilometer om gongen. Vegvesenet reknar med å få unna den første etappen før jul. For kvar etappe blir delar av tryggleiksutstyret i tunnelen kopla ut.
– Men naudtelefonane vil vere i drift, det same gjeld ventilasjonen. I tillegg kan tunnelen stengast både lokalt og frå Vegtrafikksentralen. Mobilnett og naudnett blir heller ikkje påverka, seier Nilsen.
Arbeidet startar komande måndag frå Aurland-sida. Det blir kolonnekøyring frå måndag morgon til laurdag ettermiddag.
