Jølstringane samla seg: Går vidare med liten SIS

Under kommunestyremøte i Jølster tysdag, reiste gruppeleiar i SV, Jakob Andre Sandal, eit framlegg om å stenge døra for ei samanslåing med HAFS-kommunane Askvoll og Fjaler.

– Vi vil høyre på folket og vil gå vidare med prosessen i indre Sunnfjord, sa Sandal.

Det fekk han brei støtte for frå dei fleste parti. Både Venstre, Sp, og Ap var samde, medan Høgre vil framleis vente med å skyve HAFS-kommunane ut.

– Eg meiner det vil styrke distriktsprofilen å få med Askvoll, vi har blant anna lik næringsstruktur. Eg meiner at ein kommune med 30.000 innbyggar ikkje blir for stor, og at det er feil tidspunkt å seie ja eller nei no, sa Anders Kristian Sægrov.

• Les også: Fleirtalet i Jølster seier ja til storkommune i Sunnfjord
• Les også: Her er resultata frå folkerøystingane

Kraftmillionar skapte debatt

Det som skapte mest debatt i under kommunestyremøtet i Jølster var korleis ein skulle bruke framtidige kraftinntekter i ein eventuell ny storkommune. Både Sp og SV argumenterte for å ta det med som eit forhandlingskort.

Det fekk Anders Kristian Sægrov til å gå på talarstolen og seie at tilleggsforslaga fekk han til å bli lei seg.

– Eg meiner Jølster må gå inn med eit ope sinn, sa Sægrov.

Han fekk støtte frå Atle Hamar i Venstre som meinte det ville vere feil å stille ultimatum

Fleirtal for SIS

Då saka kom til avrøysting, sa eit samrøystes kommunestyre ja til å gå vidare med samanslåing med nabokommunane Førde, Naustdal og Gaular, med sikte på ei avgjerd i juni. Kommunestyret sa samstundes nei til at Fjaler og Askvoll får vere med i samarbeidet.

• Les også: Jølster er skeptisk til Hafs-alternativet

Kommunestyret var og samrøystes om å ta inn eit punkt i intensjonsavtalen om å arbeide for å bruke kraftinntekter til etablere eit kultur- og næringsfond for Jølster.