Jobbar intenst for reiselivssamarbeid

Etter at svært mykje arbeid var lagt ned, stranda alle planar om samanslåing med reiselivsaktørane på Sunnmøre tidlegare i vår. No er målet at samarbeidsavtalar skal ligge på bordet innan utgangen av september.

Styreleiar i Reisemål Stryn og Nordfjord, Åge Starheim, omtalar arbeidet som intenst.

– Eg trur det er heilt avgjerande at vi klarar å få dette til, og det trur eg vi skal klare, seier han.

Kort tidsfrist

Nok ein gong tek Starheim til på arbeidet med å få til samarbeid i reiselivsnæringa på tvers av destinasjonar, kommunar og fylke.

Reisemål Stryn og Nordfjord har teke kontakt med selskap i Geiranger, Sogn og aust om fjella. Allereie 30. september skal eventuelle avtalar presenterast for einerane og arbeidet skjer midt i høgsesongen.

– Det er så krevjande at vi ser at det er på grensa til at dei tilsette må jobbe døgeret rundt, og det kan vi ikkje forvente eller forlange, seier Starheim.

• Les også: No står storsatsinga i fare
• Les også: Splitta Nordfjord seier nei til Sunnmøre

Trudde dei var i mål

Heller ikkje selskapa på Sunnmøre klarte å einast om ei eiga samanslåing. Dagleg leiar i Destinasjon Geiranger og Trollstigen, Ove Skylstad, har vore med på dette før.

– Eg trur vi er inne på sjuande eller åttande året med å bli eit større destinasjonsselskap. Vi trudde kanskje vi var i mål, men det skar seg i siste liten, seier han.

Skylstad er usikker på kva som gjer at det er vanskeleg å einast innan reiselivet.

– Eg ser at det er ein kamp mellom bygder og mellom kommunar. Samstundes blir det berre eit knappenålshovud når du går ut i verda og ser større på det. Balansegongen i å sjå det små i det store er utfordrande, fortel han.

Vanskeleg å stå aleine

Aust om Strynefjellet finn ein Visit Jotunheimen som er eit heilt nytt selskap, drive fram av næringslivet i Lom og omland. I august skal leiar Martine Hårstad i møte med Reisemål Stryn og Nordfjord. Ho ser mange moglegheiter.

– Vi ønskjer verkeleg å få til eit godt samarbeid vestover, for det ser vi på som svært viktig. Det er heilt klart marknadsføring, samt mogleg å selje produktpakkar saman vi kan samarbeide om, fortel ho.

I Sogn er selskapet Visit Sognefjorden inne i sitt andre år. Leiar Ståle Brandshaug trur samarbeid med andre vert naudsynt.

– Det blir vanskeleg å stå heilt aleine i framtida. Vi må ha større og sterkare strukturar. Vi er på leit etter samdriftsfordelane som ligg bak, i forhold til om vi kan jobbe tettare på ein del marknadsføringstiltak og om vi kan jobbe saman med utvikling av produkta våre, fortel han.