– Det betyr veldig mykje for meg å få vere med i denne gruppa, seier trebarnsfaren Saed Bariise frå Somalia.
Vil lære mest mogleg
Det andre redaksjonsmøte med Firdaposten er i gong denne onsdagen, og ideane fyk over bordet.
– Vi kan lage sambusa. Og vi kan dele oppskrifta foreslår Bariise.
– Og vi kan fortelje historia om korleis vi feirar våre nasjonaldagar, seier Mahshid Taravat frå Iran.
19-åringen er oppteken av å få lære om norsk kultur og å gje noko tilbake.
– Det er så mykje som er annleis her, som er spennande og nytt. Eg vil så gjerne få lære og forstå, seier ho.
Vinnarprosjekt
Gjengen som er i redaksjonen er alle plukka ut på grunn av engasjementet sitt. Dei vil formidle sin kvardag, og fortelje avislesarane om kva dei er opptekne av.
– Vi treng kvarandre, og dette er mykje meir enn noko dei skriv i ei kladdebok. Dette er alvor og andre skal lese det, seier lærar på Innvandrarsenteret i Florø.
Ho meiner det er viktig at det innvandrarane gjer også vert lagt merke til av andre.
– Dette er meir enn ein prosess, og det vert eit ferdig resultat dei kan vere stolte av, seier ho.
Firdaposten har skrive om innvandrarar, og meinte det var på tide å gje ordet til dei som ikkje så ofte får stemma si høyrt.
– Dette vinn alle på. Vi får bli kjent med nye stemmer, nye kulturar og kan dele dette med lesarane våre, og dei får innblikk i norsk kultur, seier Liv Standal i Firdaposten.