Gjøran Tefre (15) frå Førde vil satse på langrenn, og siktar seg mot toppen.
– Det er det eg synst er moro å drive med. Eg har det veldig moro når eg går på ski, seier han.
Må til Geilo
Han er eit av fleire talent som ynskjer å satse vidare på ein idrett mot toppnivå. Men her i fylket finn han ikkje ei utdanning som kombinerer utdanning og toppidrett.
Avgangseleven på Førde ungdomsskule vurderer i staden Norges Toppidrettsgymnas på Geilo neste skuleår.
Tefre meiner idrettslinjene i Sogn og Fjordane ikkje er gode nok for dei som vil satse.
– I forhold til Geilo så kan dei eigentleg ikkje måle seg. Men dersom fylket hadde hatt eit skikkeleg tilbod hadde valet vore lett, seier Tefre.
– Hadde vi hatt ei vidaregåande linje i Førde som kunne kombinert skule og idrett på ein like god måte hadde eg nok valt å bli igjen.
For dårleg tilbod
Tilbodet til elevar i vidaregåande skule er for dårleg, meiner både idrettskrinsen og skulane.
Dei er bekymra for at fråflyttinga kan skade idrettsmiljøet i fylket.
Kjell Arnestad er rektor ved Firda vidaregåande skule. Han har sett fleire unge talent forsvinne ut av fylket.
Vil byggje opp betre tilbod
Skulane og idretten i Sogn og Fjordane vil no samarbeide slik at dei ulike skulane skal spesialisere seg på enkelte idrettar.
Arnestad leiar arbeidsgruppa som skal byggje opp idrettstilbodet på dei vidaregåande skulane.
– I praksis skal kvar skule lage eit tilbod som skal inkludere opplæring i skulefaga og opplæring i idretten, seier han.
Norvall Nøringset, nestleiar i houvdutvalet for opplæring i fylket trur det vil vere mogleg å byggje opp eit toppidrettstilbod innanfor enkelte idrettar.