I sykkelbyen brukar dei bil

I mai i år vart Førde den første sykkelbyen på Vestlandet .

Nokre månader seinare kjem Statistisk sentralbyrå med rapporten som viser at ingen brukar bilen meir enn innbyggjarane i sunnfjordbyen.

– I snitt ser vi at jo mindre by, jo høgare bilhandel, seier forskingsleiar Aud Tennøy ved Transportøkonomisk institutt til Bergens Tidende.

Dårlegast i Norge

Det er på oppdrag frå Miljøverndepartementet at SSB har samanlikna 31 mellomstore norske byar for å finne ut miljøutviklinga i byane.

Og Førde med sine 12.000 innbyggjarar kom altså dårlegast ut. Her vart nemleg bilen brukt i 76 prosent av dei daglege reisene. Tønsberg kjem best ut i rapporten med 60 prosent.

• LES OGSÅ: Heng ut feilparkering på Facebook
• LES OGSÅ: Parkeringstrøbbel ved sjukehuset

– Dei mellomstore byane har ofte lågare tettheit, og då blir det fort bilavstandar. Om dette er eit problem, er eit politisk spørsmål. Men har ein eit ynskje om å redusere klimautslepp, er det jo problematisk, seier Tennøy til avisa.

Dårleg tilrettelagt

Samstundes som bilbruken er høg, viser rapporten også at bybussen slit med å fylle seta. Berre ein prosent av daglegreisene skjer med kollektivtrafikk. Ingunn Hove (28) seier til Bergens Tidende at sentrum er dårleg tilrettelagt for mjuke trafikantar og ser ikkje vekk ifrå at lange avstandar kan vere ei medverkande årsak.

Tennøy fortel at over halvparten vel bil når reiselengda er over ein kilometer. Det er dårleg nytt for politikarane i Førde der stadig fleire butikkar flyttar til nye shoppingsenter utanfor sentrum.

– Ein bør difor lokalisere mest mogleg bustadbygging, næringsutvikling og handel sentralt. Shoppingsenter utanfor byen er ikkje eit sjakktrekk, seier ho til avisa.

– Vil endre seg

Ordførar i Førde, Olve Grotle, både håpar og trur at ting vil vere endra om få år.

For medan kommunen dei siste ti åra har sett lengda gang- og sykkelvegar bli redusert med 0,2 kilometer, har kommunen gjennom sykkelavtalen forplikta seg til å satse på dei mjuke trafikantane.

• LES OGSÅ: Kva irriterer du deg over i trafikken?

– Vi arbeider no med ein trafikkpakke, der eitt av elementa er å få ned bilbruken i sentrum av Førde. Kommunen har også inngått ein sykkelvegavtale med fylkeskommunen og Statens vegvesen, seier han.