Han er klar til hjortejakta startar i morgon - er du?

– Du ser at det er eit skikkeleg trykk no på slutten med folk som vil bli klare, seier Huseklepp, som er nestleiar i fylkeslaget til Norges Jeger- og Fiskerforbund i Sogn og Fjordane.

1. september startar hjortejakta, og ho held fram til vesle julaftan. Ifølgje Norges Jeger- og Fiskerforbund er det venta at om lag 50.000 hjortejegarar skal felle om lag 35.000 hjort i løpet av hausten.

Og sjølv om jakt er moro, vil Huseklepp gjerne også fokusere på den oppgåva dei har føre seg.

– Vi skal ta ut ein del dyr. Samfunnet har bestemt kor stor stamme vi skal ha, og jegerane har oppgåva med å ta dyra ut. Då må vi gjere det på ein slik måte at det er trygt å gå i skogen, at vi feller dyra rett, og tek vare på kjøtet, seier han.

For det er ei stor oppgåve dei har føre seg på hjortejakt.

Tala i tabellen nedst i saka syner at medan jegerane i ein periode midt på 2000-talet skaut opp mot eller over 80 prosent av hjorten dei hadde løyve til, har det talet gått ned til under 70 prosent dei tre siste åra.

• LES OGSÅ: Hjorten kommer

– Kvar jeger må ta eit oppgjer med seg sjølv

Huseklepp er ikkje utan vidare glad for det store trykket på skytebana like før jakta. Han vil at mange skal ta geværet langt tidlegare, for å verte fortrulege og få erfaring med våpenet.

– Visst du berre tek rifla ut av skapet og går rett ned på bana rett før jakta, er det nokon som vil kunne slite med å treffe der dei skal. For mange kan det vere ein krevjande situasjon.

– Men visst ein berre så vidt klarar prøvane: bør ein då gå ut i skogen å skyte?

– Nei, det er der kvar enkelt jeger må ta eit oppgjer med seg sjølv. Er eg godt nok trent? Kva tid er eg god nok til å skyte? Kor god er eg?

Difor anbefaler han at utrente og uerfarne jegerar ligg på bøen med god støtte, med dyra med breisida til, i staden for å vere i skogen med høg puls, dårleg støtte, og få sekund på å fyre av eit skot.

– Vi driv aktiv opplæring av jegerar, og skildrar den situasjonen. Det er langt meir krevjande å skyte eit dyr i skogen.

• LES OGSÅ: Blinkskot på hjorten - med kamera

– Å skadeskyte er ei forferdeleg

Huseklepp er instruktør, driv opplæring og har ansvar for å kurse nye jegerar. Han har følgjande råd til dei som skal ut på jakt for fyrste gong.

– Syt for at du har moglegheit til å treffe når du skyt. Då vil du få ei god oppleving. Til jaktlaga vil eg oppmode om å ikkje leggje press på dei som er nye. Det å oppleve å skadeskyte ein hjort er ei forferdeleg oppleving. Ingen jegerar vil oppleve det. Med press og stress er sjansen for å oppleve det større.

12. og 14. september skal fylkeslaget i forbundet ha kurs på Breim, der dei skal lære opp nye jegerar.

– Det er viktig å ta vare på dei, for vi har så mykje hjort i Sogn og Fjordane at vi treng nye jegerar for å ta ut nok dyr. Då fokuserer vi på tryggleik under jakta og at vi skyt for at dyra skal døy, og døy med minst mogleg liding.

• LES OGSÅ: Marius er ein av 44.000 som har venta i spaning på årets høgdepunkt
• LES OGSÅ: Jegerar vil skyte fleire hjortar for å hindre matkrise for skogsdyra

– Har vorte betre

Den erfarne jegeren meiner det har vorte meir fokus på trygg og human jakt, sokalla god jaktmoral. Tidlegare har det vore snakk om jeger og beger, altså mykje fest og moro under jakt.

– Der vil eg sei, og eg er rimeleg nøye på at ting skal vere skikkeleg, det har vorte skikkeleg bra.

I tillegg til obligatoriske prøveskot som tvingar jegerar til å trene, kom jegerprøven på 12 timar i 1986. No er prøven 30 timar med opplæring.

– Du får ein heilt anna bakgrunn når du skal ut på jakt, enn om du ikkje hadde hatt prøven.