Leiar Vidar Moen i Årdal Jeger og Fiskarforening konstaterer at fjellfiskesesongen 2015 blir svært redusert.
– Det blir ein kontrast til fjoråret, då vi hadde ein kjempesommar med 358 overnattingar på fiskehyttene våre. No er det mange av dei gode fiskevatna som ikkje er opne. I Mannsbergvatnet er om lag 25 prosent isfritt, i Nedre Buvatnet 30 prosent.
Men i Koldedalen mellom Tyinholmen og Vettismorki er vatna heilt islagde. Moen trøystar seg med at når isen først tek til å gå, så går han fort.
– Eg køyrde forbi Tyin onsdag 1. juli. Då var det så vidt ope langs land, elles var vatnet heilt islagt. Då eg kom att måndagen etter var isen heilt vekk.
- Les også:
Blir neppe isfrie i år
I fjellområdet mellom Lærdal og Aurland er det mange gode fiskevatn over 1400 meters høgde. I år kan det hende at isen på mange av dei ikkje går i det heile. Ole Ramshus Sælthun har vore ein flittig fiskar kvar sommar, men i år ser det ut til å bli vanskeleg.
– Eg hadde planlagt å ta turen opp denne veka, men folk eg har snakka med seier at det ikkje er ope i det heile i Ljosegrunnsvatna. Eg veit ikkje om dei blir opne i år. I tillegg er ikkje anleggsvegen opp i området opna. Difor fiskar eg på Hemsedalsfjellet i staden.