Betalar store summar for å fiske i Årøyelva

– Eg kjem hit mest på grunn av naturen. Norge er fantastisk. Fiskinga er ein bonus, men å fange noko, er heilt utruleg.

Det seier briten Mark Harris.

Utstyrt med ei gedigen laksestong møter han NRK.no langs breidda lans Årøyelva i Sogndal.

Kongen og andre kjendisar

Som ein kontrast til cruiseturistar som brukar det meste av pengar, vel nokre få å bruke fleire hundre tusen på laksefiske i eksklusive elver som denne. Til stor glede for dei som sel fiskerettar.

– Det er eit fantastisk privilegium å ha eit produkt som ei lakseelev gir, og folk som vil komme og betale for. Men vi jobbar hardt for at dei skal trivast godt, seier Knut Munthe Olsen.

Han er gift inn i den niande generasjonen som eig Årøyelva og fungerer som vertskap, kokk og alt moglegmann for fiskegjestene i den myteomspunne elva.

(Artikkelen held fram under biletet.)

Årøyvassdraget med den kraftregulerte Helvetesfossen strekkjer seg berre 1500 meter frå tuppen av Hafslovatnet og ned til botnen av Sogndalsfjorden. Av desse er det mogleg å fiske på ein strekning på 1200 meter.

Men trass i at dette er eit av dei kortare vassdraga blant landets 400 lakseførande elver, blir Årøyelva rekna som ei av dei mest eksklusive, og ei av elvene med størst fisk.

Her har hotellkongar, oligarkar motedronningar og vår eigen Kong Harald fiska. Sistnemnde seinast i 2012.

• LES OGSÅ: Her landar kongen laks i Sogn
• Les om Årøyelva si historie i NRK sitt Fylkesleksikon

(Artikkelen held fram under biletet)

Frå 94.000 kroner

Etter 100 år med fast utleige, har familien Munthe Olsen no opna opp for andre, betalingsdyktige fiskarar. Eit opphald her kostar frå 94.000 kroner – for ei fiskestong. Ei vekes opphald kan koste opp mot 300.000 kroner. Også når fisken glepp.

Den engelske vennegjengen NRK.no møter, har heile elva for seg sjølv. I tillegg får dei eigne guidar og eit privat hus rett ved elva, der Munthe Olsen sjølv lagar tre retters middag til gjestene.

– Her slappar dei av når dei ikkje er i elva, og enkelte slappar ikkje av i det heile tatt, dei er berre i elva, ler verten.

• Lakseelver.no har oversikt over alle landets lakseelver

Pengar i lokalsamfunnet

Skilnaden er stor frå dei store turiststadene på Vestlandet, der tusenvis av cruiseturister kjem og reiser kvar dag. Ifølgje ein turiststudie frå Universitet i Bergen, legg desse att lite pengar lokalt utover billettar til attraksjonar, suvenirar og transport.

Ifølgje studien legg ein cruiseturist i snitt att 300 kroner dagen i Norge.

• LES OGSÅ: Rundballeprotest mot cruiseturismen i Flåm - turistane reagerar med frykt
• LES OGSÅ: No vil også reiselivsdirektøren bremse turiststraumen

(Artikkelen held fram under biletet.)

– Eg veit ikkje kor mykje cruiseturistane legg att i pengar. Eg høyrer at det ikkje er all verda. Men her har vi fiskarar som betaler ein god pris for å fiske, og pengane blir ført tilbake i lokalsamfunnet i varer og tenester vi kjøper. Det genererer mykje pengar på mange, poengterer Munthe Olsen.

Og sjølv om det er ein stiv pris, så vil britane NRK.no møter i Sogn komme tilbake.

– Det er verdt kvar einaste krone. Denne staden har alt. For meg er det verdt pengane. Vi kjem hit kvart år i juni eller juli. Så vi kjem tilbake, lovar Mark Harris.