Politiet melde klokka 22.30 fredag kveld om ein pipebrann på Svidalsneset i Jølster. Brannen har oppstått i eit hus med torvtak.
Jan Gunnar Holvik ved Alarmsentralen seier klokka 23.35 at brannvesenet fekk kontroll på flammane like før klokka 23. Det er førebels uvisst kor mykje pipebrannen har fått spreie seg.
– Dei er ikkje sikre på om det er meir varme i huset, og jobbar no vidare på staden. Dei vil vere der så lenge som det er behov, seier Holvik til NRK.no.
Det var ein person i huset då det byrja brenne. Vedkommande er komen ut og får oksygen for røykskadar, opplyser operasjonsleiar Marianne Føleide i politiet klokka 23.10.
Både brannvesen, politi og ambulanse rykte ut til staden.